Երեկ Ռուսաստանի մի խումբ քաղաքական և հասարակական գործիչներ հայտարարել են, որ ստեղծում են «Կլոր սեղան» հավաք՝ խաղաղ իշխանափոխության համար ուղիներ որոնելու նպատակով:
Ինչպես հաղորդում է grani.ru-ն, «Կլոր սեղան» հավաքի բացումը՝ նվիրված սահմանադրության օրվան, տեղի է ունեցել Մոսկվայում: Դրանում մասնակցություն են ունեցել փաստաբան 3ուրի Շմիդտը, ռեժիսոր Յուրի Նորշտեյնը, գրողներներ Վլադիմիր Վոյնովիչը և Ալեքսանդր Կաբակովը, գիտնականներ Յուրի Ռիժկովը և Եվգենի Յասինը, դերասանուհիներ Լիա Ախեջակովան և Նատալյա Ֆատեևան, քաղաքագետներ Լիլյա Շևցովան և Գեորգի Սատարովը, իրավապաշտպաններ Լյուդմիլա Ալեքսեևան, Սերգեյ Կովալյովը և Ալեքսեյ Սիմոնովը, ինչպես նաև «Ժողովրդական ազատության» կուսակցության համանախագահներ Բորիս Նեմցովը, Միխայիլ Կասյանովը և Վլադիմիր Ռիժկովը:
Հավաքի ժամանակ քննարկվել են փորձագիտական զեկույցներ Ռուսաստանում ձևավորված քաղաքական համակարգի, երկրի տնտեսական զարգացման սցենարների և խաղաղ իշխանափոխության ուղիների մասին:
«Դեկտեմբերի 12-ի կլոր սեղանի» մասնակիցների նախագծում առաջարկվում է երկու ամսով հետաձգել նախագահական ընտրությունները և չեղյալ հայտարարել խորհրդարանական ընտրությունների արդյունքները: Միաժամանակ, քննարկման մասնակիցների կարծիքով, անհրաժեշտ է փոխել ընտրական օրենսգիրքը, դադարեցնել Կրեմլից «քաղաքական մրցակցության ղեկավարումը», ապահովել դատական համակարգի և մամուլի ազատ գործունեությունը, չեղյալ համարել «կուսակցությունների գրանցմանը խոչընդոտող հակաօրինական դատական որոշումները», ինչպես նաև փոխել ԿԸՀ նախագահին:
«Կլոր սեղանի» մասնակիցներն առաջարկում են իրենց ծրագիրը քննարկել և լրացնել մամուլում և սոցցանցերում: Նրանք երկխոսության են հրավիրում բոլոր նրանց, ովքեր ձգտում են խաղաղ իշխանափոխության: