Եթե «Ժառանգություն» կուսակցության առաջնորդ Րաֆֆի Հովհաննիսյանն ասում է, որ քաղաքական այդ ուժը «հակված է դաշինքային լուծումների», նշանակում է դա կուսակցության բոլոր պատգամավորների տեսակետն է: «Առաջին լրատվական»-ի հետ զրույցում այս մասին հայտարարեց ԱԺ «ժառանգական» պատգամավոր Անահիտ Բախշյանը:
Հարցին՝ կա՞ն քաղաքական կոնկրետ ուժեր, որոնց հետ համագործակցության եզրեր արդեն իսկ նշմարվում են, պատգամավորն ասաց. «Ինչքանո՞վ է հարմար ինձ հարցնել այն մասին, ինչ որ Րաֆֆի Հովհաննիսյանն ասել է կուսակցության անունից: Նրա ասածը մեր բոլորի տեսակետն է: Ամեն բան արդեն իսկ ասվել է»,- նկատեց պատգամավորը:
Նշենք, որ այսօր կայացած մամլո ասուլիսի ժամանակ «Ժառանգություն» կուսակցության առաջնորդ Րաֆֆի Հովհաննիսյանը հայտարարել էր, որ «Ժառանգությունը» հակված է «դաշինքային, ավելի լայն լուծումների գնալ», միաժամանակ, ոչ կուսակցության ներսում և ոչ էլ որևէ այլ քաղաքական ուժի հետ առայժմ չի քննարկվել ընտրություններին մասնակցելու ձևաչափը և ցուցակների հարցը: