News Georgia-ի փոխանցմամբ՝ Վրաստանի փոխարտգործնախարար Նինո Կալանդաձեն այսօր կայացած ճեպազրույցի ժամանակ հայտարարել է, որ ԵՄ-ի հետ ազատ առևտուրը կարևոր է Վրաստանի տնտեսական զարգացման համար.
«Այսօր Բրյուսելում պաշտոնապես հայտարարվելու է այն քաղաքական որոշման մասին, որը Բրյուսելն ընդունել է Վրաստանի վերաբերմամբ։ Խոսքը Վրաստանի հետ խորացված ու համապարփակ ազատ առևտրի մասին համաձայնագրի կնքման բանակցությունների սկսման մասին է։
Փորձագետների մակարդակով աշխատանքային խմբի առաջին հանդիպումը տեղի է ունենալու 2012 թվականի հունվարին։ Այդ բանակցությունները մեզ համար շատ կարևոր են։ Մենք շատ բան ենք արել դրա համար, և արդյունքում հասել նրան, որ Վրաստանը բավարարել է ԵՄ-ի պահանջները այդ բանակցությունների սկսման համար։ ԵՄ-ի հետ ազատ առևտուրը շատ մեծ նշանակություն ունի Վրաստանի տնտեսական զարգացման տեսանկյունից»։
Հիշեցնենք, որ 2010 թվականին Վրաստանի ու ԵՄ-ի միջև ապրանքաշրջանառությունը կազմել է 1.7 միլիարդ դոլար։
