2011-ը հագեցած, բայց բացթողումներով լի տարի էր. ավարտվող տարվա մասին իր տեսակետը հայտնեց «Ժառանգություն» կուսակցության ղեկավար, ՀՀ ԱԺ պատգամավոր Րաֆֆի Հովհաննիսյանը:
«Նախընտրական շրջան է, բայց կարծում եմ` Հայաստանը մեծ փոփոխությունների նախաշեմին է: Միաժամանակ ավարտվող տարին մեզ պարտության տանող տարի էր: Ցավում եմ, որ օրենքը Հայաստանում հատվածաբար է կիրառվում, և սլաքի տակ են վերցվում թույլ օղակները: Իհարկե, օրենքը պետք է գործի, սակայն առաջին հերթին` պաշտոնյաների համար:
Այնպես որ, ես հույս եմ տածում, որ բոլոր քաղաքական ուժերը մտածողության փոփոխություն կունենան. կամ պետք է փոխվենք, կամ էլ այսպես պետք է շարունակենք: Ամեն մեկը լուծումները պետք է իրականացնի ժողովրդի համար` իրենից վեր, իրենից լայն»,- նկատեց Րաֆֆի Հովհաննիսյնաը:
Անդրադառնալով Եվրոպական ժողովրդական կուսակցությանը հայաստանյան չորս կուսակցությունների անդամակցության թեմային` Հովհաննիսյանը նկատեց, որ ԵԺԿ-ն պիտի որոշի` հայաստանյան որ քաղաքական ուժերն են արժանի անդամակցելու իրեն:
«Այս պահի դրությամբ ոչ ոք չի մերժվել, ոչ ոք կուսակցության շարքեր չի ընդունվել: Միաժամանակ, չեմ կարծում, որ հայաստանյան չորրորդ քաղաքական ուժին` ԲՀԿ-ին, բացառելու հիմքեր կային: Ամեն բան պարզ կլինի առաջիկա փետրվարին»,- նկատեց նա: