Ռուսական Regnum լրատվական գործակալության փոխանցմամբ, Վրաստանի նախագահ Միխեիլ Սաակաշվիլին դեկտեմբերի 7-8-ին Մարսելում տեղի ունեցած Եվրոպական ժողովրդական կուսակցության 20-րդ կոնգրեսից հետո պարզաբանել է, թե ինչու՞ է Վրաստանը դուրս եկել ԱՊՀ կազմից և ընտրել ԵՄ-ին ինտեգրվելու ուղին.
«Ես լավ հիշում եմ, որ երբ Վրաստանն ԱՊՀ-ի անդամ էր, և մենք մասնակցում էինք ԱՊՀ-ի բոլոր նիստերին, այդ կազմակերպության անդամներին ընդհանրապես ոչինչ չէին հարցնում, նրանց կարծիքը ոչ ոքի չէր հետաքրքրում։ Եվ երբ ինձ հարցնում են, թե Եվրոպան ինչո՞վ է տարբերվում ԱՊՀ-ից, ես նշում եմ այդ մասին։
Եվրոպան ազատ ժողովուրդների միություն է, որը հիմնված է ազատ կամքի, ազատության ու ինքնիշխանության հանդեպ տածած հարգանքի վրա։ Այսօր Եվրոպան ֆինանսական խնդիրներ ունի, և ԵՄ-ը փորձում է ելք գտնել։ Իսկ այն փաստը, որ բանակցային սեղանի շուրջ, ուր վճռվում է այդ հարցը, նստած է նաև Վրաստանը, շատ կարևոր է մեր երկրի համար»։
Հիշեցնենք, որ Վրաստանն ԱՊՀ-ին անդամակցել է 1993 թվականին։ 2008 թվականի օգոստոսի 12-ին (ռուս-վրացական հնգօրյա պատերազմի ավարտման օրը) Սաակաշվիլին հայտարարեց ԱՊՀ կազմից Վրաստանի դուրս գալու ցանկության մասին։
Դրանից երկու օր անց Վրաստանի խորհրդարանը միաձան (117 կողմ) հավանության արժանացրեց ԱՊՀ-ի կազմից դուրս գալը։ 2009 թվականի օգոստոսի 18-ին (համապատասխան դիմում ուղարկելուց 1 տարի անց) Վրաստանը պաշտոնապես լքեց ԱՊՀ-ն։
