News Georgia-ի փոխանցմամբ՝ Հարավային Օսիայի գործող նախագահ Էդուարդ Կոկոյտին այսօր հրաժարական է տալու։ Այս մասին պայմանավորվածությունը ձեռք է բերվել երեկ երեկոյան. Կոկոյտին և նախագահական ընտրությունների նախկին թեկնծաու Ալլա Ջիոևան Ցխինվալում ստորագրել են համապատասխան համաձայնագիր։
Այդ փոխզիջումային համաձայնագրով նախատեսվում է, որ Ջիոևան դադարեցնելու է Ցխինվալի հրապարակում իր համակիրների բողոքները, ինչը շարունակվում էր 10 օր շարունակ։ Դա նշանակում է, որ այսօր տեղի չի ունենա Ջիոևայի՝ որպես Հարավային Օսիայի նախագահ, երդման արարողությունը, ինչի մասին հայտարարվել էր ավելի վաղ։
Հարավային Օսիայում նախագահական նոր ընտրությունները տեղի կունենան 2012 թվականի մարտի 25-ին։ Մինչ այդ նախագահական պարտականությունները կկատարի վարչապետ Վադիմ Բրովցևը։
Բացի այդ, համաձայնագիրը նախատեսում է Հարավայի Օսիայի գլխավոր դատախազ Թեյմուրազ Խուգաևի ու նրա տեղակալ Էլդար Կոկոևի հրաժարականը, ինչը պայմանավորված է նրանով, որ նրանք չեղյալ էին հայտարարել նոյեմբերի 27-ի նախագահական ընտրությունների երկրորդ փուլի արդյունքները։
Հիշեցնենք, որ երեկ Ջիոևան հայտարարել էր, որ պատրաստ է մասնակցել 2012 թվականի մարտի 25-ի նոր նախագահական ընտրություններին, եթե մինչ այդ ստանձնի նախագահի ժամանակավոր պաշտոնակատարի գործառույթները։
