Աշխատանքի և սոցիալական հարցերի նախարարության սոցիալական ապահովության նախկին պետ Վազգեն Խաչիկյանին երեկ «Հրապարակ»-ի թղթակիցը նկատել է Նալբանդյան փողոցում՝ ոստիկանության քննչական բաժին մտնելիս, ինչից կարելի է ենթադրել, որ նա հարցաքննվել է սոցապծառայությունում հայտնաբերված յուրացումների գործի շրջանակում:
«Հարցաքննվելու փաստն անձամբ Խաչիկյանից մեզ չհաջողվեց պարզել: Հայտնի է, որ Խաչիկյանն աղմկոտ բացահայտումից ու պաշտոնանկ լինելուց հետո ընդհատակ է անցել, միայն երբեմն հայտնվում ե քեֆերի սեղանների շուրջ, մասնավորապես՝ վերջին անգամ Ախթալայում խորովածի փառատոնին էր մասնակցում:
Ոստիկանության հասարակայնության հետ կապերի և լրատվական ծառայության պետ Աշոտ Ահարոնյանը ոչ հերքեց և ոչ էլ հաստատեց ՝ հարցաքննվելու վերաբերյալ մեր տեղեկությունը, միայն նշեց հետևյալը. «Այդ գործի շրջանակներում բազմաթիվ անձինք են կանչվել ու հարցաքննվել, նախաքննության շահերից ելնելով՝ այս պահին այդ անձանց տվյալները հրապարակելը նպատակահարմար չէ»:
Հիշեցնենք, որ այս գործով հարցաքննվել է 24 հոգի, ստորագրությամբ բաց են թողնվել բոլորը: Կալանավորվել է միայն Նոր Նորքի տարածքային կառույցի պետի տեղակալը՝ Արթուր Սուքիասյանը, որը մեղադրվում է 2008-ին Քանաքեռ-Զեյթունի տարածքային բաժնից 17 միլիոն դրամ հափշտակելու մեջ»: