Ադրբեջանական Turan լրատվական գործակալության փոխանցմամբ, Խաղաղության ու ժողովրդավարության ինստիտուտի տնօրեն Լեյլա Յունուսն այսօր տված մամլո ասուլիսի ժամանակ հայտարարել է, որ 2011 թվականին Ադրբեջանում սաստկացել են քաղաքական բռնությունները։
Յունուսի խոսքերով, այս տարի գրանցվել է 2003 թվականից ի վեր քաղբանտարկյալների ամենամեծ աճը. «Այս տարի Ադրբեջանում քաղբանտարկյալների քանակն ավելացել է 26-ով։ Նրանց ընդհանուր թիվը գերազանցում է 70-ը։ Բացի այդ, այս տարի Ադրբեջանում 60,000 մարդու զրկել են իրենց սեփականությունից՝ կազմակերպելով հարկադիր վերաբնակեցում։ Եվս 50,000 մարդ գտնվում է նման վտանգի տակ»։
Հիշեցնենք, որ այս տարվա նոյեմբերի կեսերին Ադրբեջանում մարդու իրավունքների վերաբերյալ Amnesty International միջազգային իրավապաշտպան կազմակերպության հրապարակած զեկույցում նշված էր, որ ներկայիս դրությամբ Ադրբեջանում առկա են 17 խղճի բանտարկյալներ։
