ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ դեկտեմբերի 9-ին ԱԺ-ում Լիբանանի Հանրապետության նախագահ Միշել Սուլեյմանը և նրա գլխավորած պատվիրակությունը հանդիպել է ՀՀ ԱԺ նախագահ Սամվել Նիկոյանի հետ:
Հանդիպմանը ներկա էին ԱԺ փոխնախագահներ Էդուարդ Շարմազանովը, Սամվել Բալասանյանը, մշտական հանձնաժողովների նախագահներ, ԱԺ խմբակցությունների ներկայացուցիչներ:
ՀՀ ԱԺ նախագահը համոզմունք է հայտնել, որ Լիբանանի նախագահի այցը կխթանի հայ-լիբանանյան հարաբերությունները, ինչպես նաև կնպաստի միջխորհրդարանական համագործակցության զարգացումը:
Գոհունակությամբ փաստելով, որ հայ-լիբանանյան միջխորհրդարանական համագործակցությունը գտնվում է բարձր մակարդակի վրա ` Ս. Նիկոյանը նշել է, որ իր կողմից կանի հնարավորը, որ փոխգործակցությունն ավելի խորանա և զարգանա:
Կարևորելով միջխորհրդարանական կապերը ` ԱԺ նախագահը նշել է, որ դրանք հանդիսանում են միջպետական հարաբերությունների կարևոր բաղադրիչ և խորհրդարանների շփումների ակտիվացումը ինչպես երկկողմ, այնպես էլ բազմակողմ ձևաչափով նպաստում են փոխըմբռնման և փոխվստահության ամրապնդմանը, միասնական տեսակետների շրջանակի ընդլայնմանը և երկրների միջև համագործակցության զարգացմանը:
Նրա խոսքով` Հայաստանը Լիբանանի հետ ունենալով բազմաթիվ ընդհանրություններ ու ժողովուրդների միջև բարեկամության պատմական ավանդույթներ ` շարունակելու է արդյունավետ համագործակցությունը թե′ միջազգային ասպարեզում և թե′ երկկողմ հարաբերությունների զարգացման ուղղությամբ։
ՀՀ ԱԺ նախագահը բարձր է գնահատել Լիբանանի եղբայրական վերաբերմունքը լիբանանահայության հանդեպ: Նրա խոսքով` Լիբանանի հայ համայնքը, հանդիսանալով հուսալի և ամուր կամուրջ երկու բարեկամ երկրների և ժողովուրդների միջև, միաժամանակ, կարողացել է պահպանել իր ազգային հարուստ մշակույթն ու արժեքները, ակտիվորեն մասնակցել Լիբանանի քաղաքական, սոցիալ-տնտեսական և մշակութային կյանքին:
Ս. Նիկոյանը նշել է, որ բազմազգ ու բազմակրոն քաղաքակրթություն ունեցող Լիբանանը մշակույթների և կրոնների երկխոսության, կրոնական հանդուրժողականության, ժողովրդավարության լավագույն օրինակ է հանդիսանում:
Անդրադառնալով տարածաշրջանային խնդիրներին` ԱԺ նախագահը կարևորել է տարածաշրջանային կայունությունը և խաղաղությունը ու այս համատեքստում շնորհակալություն հայտնել Լիբանանի կառավարությանը ԼՂ հակամարտության կարգավորման հարցում հավասարակշռված դիրքորոշման համար: Նա անթույլատրելի է համարել նման հարցերում երկակի ստանդարտների կիրառումը:
Լիբանանի նախագահը համոզմունք է հայտնել, որ նրա նախագահության օրոք հայ-լիբանանյան միջխորհրդարանական գործակցությունը կշարունակի զարգանալ և ամրապնդվել: Նա բարձր է գնահատել Հայաստանում ժողովրդավարության ամրապնդմանն ուղղված գործընթացները:
Պարոն Սուլեյմանը կարևորել է միջազգային կառույցներում երկու երկրների համագործակցությունը և փոխաջակցությունը: Անդրադառնալով ԼՂ հիմնախնդրին`նա նշել է, որ այն պետք կարգավորվի միջազգային չափանիշներին համապատասխան, ազգերի ինքնորոշման սկզբունքի հիման վրա:
Հանդիպման վերջում Լիբանանի նախագահը գրառում է կատարել ԱԺ պատվավոր հյուրերի գրքում:
