Թուրքական Hürriyet թերթի փոխանցմամբ, Անկարայի մասնավոր արխիվներից մեկում հայտնաբերվել են 1954 թվականի փետրվարին արված լուսանկարներ, որոնցում հանրահայտ դերասանուհի, երգչուհի, մոդել Մերիլին Մոնրոն Կորեայում պատկերված է թուրք զինծառայողների հետ։ Վերջիններս ծառայում էին Կորեական պատերազմին (1950-1953) մասնակցող թուրքական բրիգադի կազմում։
Լուսանկարները մեկնաբանել է Անկարայում բնակվող գործարար և կոլեկցիոներ Մուհամեթ Յուքսելը. «1954 թվականի հունվարի 14-ին Մերիլին Մոնրոն ամուսնանում է Ջո Դի Մաջիոյի հետ և մեղրամիսն անցկացնելու նպատակով մեկնում Ճապոնիա։ Սակայն շուտով նրանց միջև վիճաբանություն է ծագում, և Մոնրոն ամուսնուն զայրացնելու համար ընդունում է հարևան Կորեայում մարտնչող զինծառայողներին հյուրընկալվելու ԱՄՆ կառավարության հրավերը»։
Հիշեցնենք, որ Թուրքիան Կորեական պատերազմին գործուղել էր 4500 զինծառայող։ Կորեայում թուրքական կողմի կորուստները կազմել են՝ 721 զոհ, 2147 վիրավոր, 234 գերի և 175 անհետ կորած։
