Ադրբեջանական Turan լրատվական գործակալության փոխանցմամբ՝ ամերիկյան Bloomberg հեռուստաալիքին տված հարցազրույցի ժամանակ Ադրբեջանի արտգործնախարար Էլմար Մամեդյարովը հայտարարել է, որ Ադրբեջանը գազը մեծ ծավալներով մտնելու է եվրոպական շուկա.
«Ներկայումս մենք Եվրահաձնաժողովի հետ բանակցում ենք Եվրոպային մեր գազի մատակարարման երթուղիների շուրջ։ Այդ ընտրությունը, ամենայն հավանականությամբ, կկատարվի հաջորդ տարվա սկզբին։
Եթե ամեն ինչ հարթ ընթանա, ապա առաջին անգամ ադրբեջանական գազը եվրոպական շուկաներ կհասնի 2018-2020 թվականներին։ Ադրբեջանը Թուրքիայի հետ կնքել է բոլոր անհրաժեշտ փաստաթղթերը, այդ թվում՝ նաև տարանցիկ համաձայնագիրը (այս տարվա հոկտեմբերի 25-ին Իզմիրում)։ Այժմ մենք պետք է որոշենք, թե որ երթուղով ենք մեր գազը հատկացնելու Թուրքիային ու Եվրոպային»։
Հիշեցնենք, որ ադրբեջանական «Շահ Դենիզ» գազային հանքավայրի 2-րդ փուլի մշակումը մեկնարկելու է 2017 թվականին։ Արդյունահանվելիք 16 միլիարդ խորանարդ մետր գազից Ադրբեջանը 6 միլիարդ խորանարդ մետրը պետք է հատկացնի Թուրքիային, իսկ մնացյալ 10 միլիարդ խորանարդ մետրը՝ Թուրքիայի տարածքով տարանցի դեպի Եվրոպա։
Ի դեպ, այս տարվա դեկտեմբերի սկզբին էներգետիկ հարցերով եվրակոմիսար Գյունթեր Օթթինգերի օգնական Մառլեն Հոլցները գերմանական Deutsche Welle-ին տված հարցազրույցում հայտարարել էր, որ «Անդրկասպյան» գազատարի կառուցման կարիքը կարող է ընդհանրապես չզգացվել.
«Եթե Ադրբեջանը վճռի, որ դեպի Եվրոպա իր գազի արտահանման համար բավական է օգտվել այնպիսի խողովակաշարից, որի թողունակությունը կազմում է տարեկան միայն 10 միլիարդ խորանարդ մետր, ապա մենք պետք է մտածենք, թե ինչ ենք անելու «Անդրկասպյան» գազատարի հետ։ Հնարավոր է, որ դրա կառուցման կարիքն ընդհանրապես չզգացվի։
Ես չգիտեմ, թե արդյունքում որ խողովակաշարի նախագիծը (Nabucco, TAP) կիրագործվի։ Եթե «Շահ Դենիզ»-ի գազը Եվրոպա է հասնելու արդեն իսկ գոյություն ունեցող ցանցի միջոցով, ապա ԵՄ-ը մտադիր չէ պնդել «Անդրկասպյան» գազատարի կառուցման վրա»։
