Քաղաքական իրադարձությունները պատճենահանել հնարավոր չէ: Այսօր կայացած մամուլի ասուլիսում այս մասին հայտարարեց ՀՀԿ-ական պատգամավոր Մկրտիչ Մինասյանը` անդրադառնալով Ռուսաստանում տեղի ունեցած Պետդումայի ընտրությունների` հայաստանյան իրականության վրա հնարավոր անդրադարձի թեմային:
«Հայաստանում այլ իրավիճակ է, այլ գործընթացներ են տեղի ունենում, և մենք ժողովրդավարության առումով մի քայլ առաջ ենք: Այն, որ Ռուսաստանում իշխող կուսակցության ձայները կրճատվել են, դեռ չի նշանակում, որ նույնը կարող է պատահել նաև մեզ հետ: Նորմալ, թափանցիկ ընտրություններում «Եդինա Ռոսիա»-ն մեծամասնություն ստացավ: Մեր դեպքում` մեր առաջնորդը հորդորել է արդար, ոչ վիճահարույց ընտրություններ անցկացնել»,- նկատեց նա:
Մինասյանը անդրադարձավ նաև առաջիկա ընտրություններին «Բարգավաճ Հայաստան» կուսակցության հետ միասնական ցուցակով հանդես գալու հավանականությանը` նշելով, որ այս առնչությամբ հստակ քննակումներ դեռևս չեն եղել:
«Իսկ ո՞վ ասաց, որ առանց ԲՀԿ-ի ՀՀԿ-ն ավելի վատ արդյունքներ է ունենալու: Միաժամանակ մեր միջև լարվածություն չկա, մենք նորմալ հարաբերությունների մեջ ենք: ՀՀԿ-ի դռները բաց են համագործակցության համար: Հանրապետականը երկրում ամենակայացած քաղաքական ուժերից մեկն է, մենք պատրաստ ենք համագործակցել ցանկացած ուժի հետ: Բայց մենք «էստի համեցեք»-ի խնդիր չունենք»,- նշեց Մկրտիչ Մինասյանը:
Ասուլիսի մյուս բանախոս, պատգամավոր Վարդան Խաչատրյանն իր հերթին նկատեց, որ Ռուսաստանում իշխող կուսակցության վարկանիշը անկում է ապրել:
«Ռուսաստանյան ընտրություններում ստացված արդյունքները հետևանք են լուրջ, կայացած միջին խավի: Միջին խավը նոր դիսպոզիցիա սահմանեց: Ասել, որ մեզանում էլ նույնը տեղի կունենա, չեմ կարծում` ճիշտ կլինի: Այս պահի դրությամբ մենք նման բանի չենք կարող հավակնել:
Ցավոք, հայ հասարակությունը ամորֆ է, ինչից ելնելով` իրավիճակը մանիպուլյատիվ է լինելու: Խաղարկային իրավիճակ է, և բոլոր զարգացումներն էլ հնարավոր են: Միաժամանակ, համեմատած Ռուսաստանի հետ, մենք առավել կայացած ընդդիմություն ունենք:
Ինչ վերաբերում է հայաստանյան ներքաղաքական դաշտին, ապա կլինեն բաներ, որոնք մինչ այժմ չեն եղել: Մի քիչ դժվար եմ պատկերացնում, որ ամեն բան նախորդ անգամների նման ստացվի»,- նկատեց Վարդան Խաչատրյանը:
Նրա խոսքով` եթե ժողովուրդն ավելի վատ է ապրում, քան մի քանի տարի առաջ, ապա ՀՀԿ-ի վստահությունը մի փոքր անհասկանալի է:
«Միաժամանակ համաձայն եմ այն մտքին, որ ստեղծված իրավիճակում իշխանությունն ավելի շահեկան դիրքում է, քան ընդդիմությունը: Գտնում եմ, որ ընդդիմության վարքագծում ինչ-որ բաներ սխալ էին»:
Խաչատրյանը նաև տեղեկացրեց, որ մասնակցելու է գալիք ընտրություններին, սակայն ինչ ձևաչափով` դեռևս չգիտի:
