Իրանական Fars News լրատվական գործակալության փոխանցմամբ՝ Իրանի պետական հեռուստատեսությունը երեկ երեկոյան հայտարարել է, որ կիրակի օրն Իրանի արևելքում ամերիկյան RQ-170 անօդաչու թռչող սարքի վայր ընկնելու պատճառն իրանցի զինվորականներն են։
Նշվում է, որ Իրանի հատուկ ծառայությունները կիբերհարձակում են ձեռնարկել ԱԹՍ-ի վրա, որն էլ կորցնելով ղեկավարումն ընկել է Իրանի տարածքում։ Սակայն ամերիկյան իշխանությունները հրաժարվում են ընդունել, որ այդ ԱԹՍ-ն վայր են գցել իրանցի զինվորականները՝ ընդգծելով, որ ԱԹՍ-ն վայր է ընկել վառելանյութի սպառման պատճառով։
Երեկ իրանական հեռուստաալիքներով առաջին անգամ ցուցադրվել է ամերիկյան այդ ԱԹՍ-ն։ Նրա թևերի բացվածքը կազմում է մոտ 26 մետր, երկարությունը՝ 4.6 մետր։ Այն հագեցած է դիտարկման ու էլեկտրոնային կապի և ռադիոտեղորոշման կապերի տվյալների ստացման նորագույն տեխնոլոգիաներով։ Այն կարող է գործածվել ամենատարբեր հետախուզական նյութի հավաքման համար։
Հիշեցնենք, որ Ռուսաստանին և Չինաստանին հետաքրքրել է Իրանի մոտ հայտնված ամերիկյան այդ ԱԹՍ-ն։ Իրանը նույնպես մտադիր է օգտվել դրա նորագույն տեխնոլոգիաներից։
