Այսօր «Հայացք» ակումբում հյուրընկալված Կոնգրեսի ներկայացուցիչ Դավիթ Շահնազարյանը անդրադարձավ Վրաստանի նախկին նախագահ Էդուարդ Շևարդնաձեի հայտարարությանը:
Հիշեցնենք, որ Շևարդնաձեն սպառնալիք էր որակել Հայաստանն Աջարիային ուղիղ կապող ավտոմայրուղու կառուցումը. «Դա կարող է փոխել Աջարիայի ժողովրդագրական պատկերը։ Նայեք Աբխազիային, այնտեղ հայերն ավելի շատ են, քան՝ աբխազները։ Չեմ բացառում, որ վրացական իշխանությունները զիջումներ անեն Հայաստանին և մի շարք եկեղեցիներ հանձնեն, որոնք մեր պատրիարքարանը համարում է վիճելի»։
Դավիթ Շահնազարյանը հայտարարեց. «Ես դատապարտում եմ Շևարդնաձեի այդ հայտարարությունը: Ուզում եմ հիշեցնել, որ Հայաստանը Վրաստանին կապող հիմնական մայրուղիներից մեկը` Բագրատաշենը, կառուցվեց Շևարդնաձեից հետո: Այո՛, դա այն ժամանակ չէր կառուցվում, և դա կառուցեցին Վրաստանի ներկայիս իշխանությունները: Ուզում եմ ավելացնել, որ Շևարդնաձեն ակնարկել է նաև ինչ-որ եկեղեցիների հետ կապված հարց, ես չեմ խրախուսում նրա այդ գործունեությունը, որովհետև պետությունն ունի իր գործառույթը:
Ընդհանրապես, եթե անկեղծ լինենք, պետք է ասեմ, շատ դրականորեն պետք է նշեմ, որ այսօր Հայաստանի և Վրաստանի միջև հարթվել են այն որոշակի լարվածության տարրերը, որոնք կային մի քանի ամիս առաջ: Այստեղ Հայաստանի իշխանություններն էլ են դրական գործ արել, և որոշ փակագծեր էլ են բացել`Կոնգրեսն էլ է որոշակի աշխատանք տարել, որպեսզի այդ լարվածությունը վերանա: Այդ լարվածության պատճառներից մեկն այն թյուրիմացությունն է եղել, որ մամուլով տարածվեց, թե իբր նախագահ Սաակաշվիլին չի շնորհավորել սեպտեմբերի 21-ի կապակցությամբ Հայաստանի Հանրապետությանը: Ո՛չ, սեպտեմբերի 20-ին պաշտոնապես հանձնվել է այդ շնորհավորանքը, ես դա ամենայն պատասխանատվությամբ հայտարարում եմ: Եվ ընդհանրապես, Վրաստանի հետ մեր հարաբերությունները ունեն ստրատեգիական նշանակություն մեզ համար, և առաջնահերթային պետք է լինեն մեզ համար, և այս իմաստով ես շատ դրական եմ համարում, որ երկու երկրների իշխանությունները կարողացան այդ ամենը հարթել: Այդ լարվածությունը իմիջիայլոց ստեղծվել էր Կաթողիկոսի Վրաստան այցից հետո, հիմա, փառք Աստծո, որ այդ ամենը հարթված է»,- նշեց նա:
Այնուհետև Դավիթ Շահնազարյանը հավելեց, որ իհարկե կարող են խնդիրներ լինել: «Օր առաջ պետք է լուծվեն դեմարկացիայի` սահմանի ճշգրտման հարցերը: Դրանից հետո արդեն լուրջ հնարավորություններ կստեղծվեն, որ ընդհանրապես բոլոր անցակետերը վերացվեն Հայաստանի և Վրաստանի միջև, և լինեն այնպիսի սահմաններ` ինչպիսին կան Շենգենյան երկրներում: Դա է մեր նպատակը, և պետք է հասնենք, և վստահ եմ, որ դա բխում է Վրաստանի շահերից: Հայաստանի և Վրաստանի իշխանությունները հստակ պետք է հասկանան, որ եկեղեցիները երբեմն իրենց գործառույթներում մտնում են պետության գործառույթների դաշտը: Դա էլ չպետք է որևէ դեպքում թույլ տրվի:
Կա մի հարց, որը մեզ համար չափազանց կարևոր է, և Վրաստանի իշխանությունները պետք է հաշվի նստեն դրա հետ` խոսքը Մոզդոկ-Թբիլիսի-Հայաստան գազատարի մասին է, և ես վստահ եմ, որ Վրաստանի իշխանությունները զերծ կմնան այդ գազատարը Ադրբեջանին վաճառելուց, որովհետև դա կոմերցիոն գործարք չէ, դա կարևորագույն քաղաքական, տարածաշրջանային անվտանգության հետ կապված գործարք է, և նման քայլը ես չեմ կարծում, եթե դա կատարվի, լավ դիտվի թե՛ Հայաստանի ընդդիմության, թե՛ ՀՀ իշխանությունների կողմից»:
Լրագրողի հարցին՝ ինչպե՞ս է նա վերաբերվում Ջավախքի խնդիրներին, Դավիթ Շահնազարյանը հակադարձեց. «Ջավախքի խնդիր ասելով` ի՞նչ եք հասկանում… Աշխարհում Վրաստանից բացի այլ պետություն չկա, որ իր բյուջեով պահում է հայկական դպրոցները: Այս փաստը խնդրում եմ հաշվի առեք: Ջավախքում կան սոցիալ-տնտեսական, նաև կրթական պրոբլեմներ, բայց դրանք պետք չի լուծել առճակատման ճանապարհով: Ջավախքի սոցիալ-տնտեսական խնդիրները այնքան են, որքան Վրաստանի մնացած այլ տարածաշրջաններում: Հաշվի առեք մի բան`Ջավախքը երբեք այսպիսի կոմունիկացիոն զարգացում չէր ունեցել, որքան ունեցավ վերջին տարիներին»:
Դ. Շահնազարյանը շեշտեց նաև, որ Վրաստանն այսօր մի պետություն է, որտեղ գործում է օրենքը, որտեղ օրենքի գերակայությունն է աշխատում. «Վրաստանը տարբեր բնագավառներում այնպիսի ռեֆորմներ է իրականացրել, որ նրանց փորձի կարիքը մենք ունենալու ենք: Այսօր Վրաստանում կենցաղային կոռուպցիա չկա, հասարակության 80 տոկոսից ավելին վստահում է ոստիկանությանը… Դուք պատկերացնո՞ւմ եք դա ինչ է… Մենք նման հարևան ունենք, և դա իսկապես շատ լավ է: Ավելին` Սաակաշվիլու օրոք հայ-վրացական հարաբերությունները էապես ավելի են զարգացել, քան մինչ այդ էր՝ հատկապես կոմունիկացիոն առումով»:
Որ հայ-վրացական հարաբերությունները զարգացել են դրանում Սաակաշվիլիի՞, թե՞ Սերժ Սարգսյանի ջանքերն են, հարց ուղղեց լրագրողը. «Վրաստանի հետ կապված հարցերում կարող է ինչ-որ տակտիկական սխալներ եղել են, բայց Հայաստանի ներկայիս իշխանություններին լուրջ մեղադրանքներ այդ հարցերում ես չեմ կարող ներկայացնել, որովհետև քիչ թե շատ նորմալ է արվել ամեն ինչ»,- նկատեց Դ. Շահնազարյանը:
