Մարտի 1-ի զոհերի ընտանիքներին փոխհատուցում չտրամադրելը անբարոյականություն է: «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության քարտուղար Կարինե Հակոբյանը`անդրադառնալով Մարտի 1-ի զոհերի ընտանիքներին փոխհատուցում տրամադրելու «Ժառանգության» առաջարկին և ՀՀ կառավարության մերժմանը:
Կարինե Հակոբյանը կառավարության քայլը անբարոյականություն որակեց: Ըստ նրա`այս դեպքում այն սահման չի ճանաչում: «Ժառանգություն» կուսակցության քարտուղարի համոզմամբ` պետությունը պարտավորություններ ունի այս ընտանիքների նկատմամբ: «Ոչ միայն պարտավորություն, այլև մեղքի բաժին: Այս դեպքում այդ պարտավորությունը կրկնապատկվում է: Մեր առաջարկը և՛ ֆինանսական, և՛ բարոյական փոխհատուցմանն էր վերաբերում»,- մեկնաբանեց Կ. Հակոբյանը`հավելելով, որ բոլոր ժողովրդավարական, իրավական երկրներում այսպիսի նախադեպեր եղել են և կան: Նա մանրամասնեց, որ քաղաքական իրադարձությունների զոհերին պետությունը փոխհատուցում է կրկնակի:
Անդրադառնալով «Ժառանգություն» կուսակցության այլ առաջարկներին`ասաց, որ գրեթե բոլոր առաջարկները մերժել է կառավարությունը: «Բոլորը շատ հիմնավորված էին, բխում էին այսօր Հայաստանի հասարակության կարիքներից, բայց բոլորը մերժել է կառավարությունը»,- ամփոփեց Կ. Հակոբյանը:
Նշենք, որ ՀՀ կառավարությունը մերժել է Մարտի 1-ի զոհերի ընտանիքներին հաջորդ տարվա պետբյուջեից գումար հատկացնելու առաջարկը:
ԱԺ «Ժառանգություն» խմբակցությունն առաջարկել էր 500 միլիոն դրամի փոխհատուցում սահմանել զոհերի ընտանիքների համար` հիմնավորելով, որ այդ անձինք դարձել են պետական մարմինների ոչ իրավաչափ գործողությունների զոհը: