Հաջորդ տարվանից 3 մլն դրամի շեմը գերազանցող գործարքները պետք է կատարվեն անկանխիկ: Այս կարգը սահմանող «Կանխիկ գործառնությունների սահմանափակման մասին» օրենքի նախագիծն այսօր քննարկվեց Ազգային ժողովի նիստում: Գործարքի ժամանակ վճարողը կարող է գումարը կանխիկ փոխանցել, բայց պարտադիր կերպով ստացող կողմը պետք է լինի անկանխիկ: Դա վերաբերում է թե՛ քաղաքացիներին, թե՛ իրավաբանական անձանց: Փոխանցումները պետք է անկանխիկ իրականացվեն նաև բժշկական և կրթական հաստատություններում:
ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը հայտնեց, որ սահմանված է ժամանակացույց՝ Երևանում օրենքը գործելու է 2012 թ. հուլիսի 1-ից, մարզկենտրոններում՝ 2013 թ. հունվարի 1-ից, և այլ քաղաքներում՝ 2014 թ. հունվարի 1-ից:
ՀՀԿ-ական պատգամավոր Արտակ Դավթյանի խոսքով, օրենքն ունի հակակոռուպցիոն ուղղվածություն և բացառում է ստվերային շրջանառությունը:
ԲՀԿ խմբակցությունից պատգամավոր, ՍԴՀԿ նախագահ Էռնեստ Սողոմոնյանը, նշելով, որ որպես փաստաթուղթ օրենքը հոյակապ է, հայտարարեց, որ այն վաղաժամ է. «Սա խորթ համակարգ է մեզ, էլ չեմ ասում սոցիալական այն համակարգի մասին, որ կուտակում են կամաց-կամաց, որ վերանորոգում իրականացնեն, կամ նիսյայով են գնում: Այս օրենքով մղում եք, որ գնան բանկային համակարգին հարստացնեն: Էս ի՞նչ եք անում»:
