Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Եվրոպայի ժողովրդական կուսակցության համագումարում ունեցած ելույթից հետո պատասխանել է լրագրողների հարցերին.
«Շատ կարևոր է, որ եվրոպական տերմինաբանության մեջ ամրագրվել են «օկուպացիա» և «էթնիկ մաքրում» բառերը։ «Էթնիկ մաքրում»-ը նշանակում է, որ ոչ ոք երբեք չի կարող օրինականացնել խլված վրացական գյուղերն ու տները։ Ոչ ոք չի կարող օրինականացնել վտարված մարդկանց ունեցվածքի սեփականաշնորհումը։
«Օկուպացիա» բառն իր հերթին նշանակում է, որ այն մշտապես ավարտվում է ապաօկուպացմամբ։ Ներկայիս Ռուսաստանն այդքան պաշար չունի, որպեսզի կարողանա շարունակել վրացական տարածքների օկուպացիան։ Մենք բոլորս տեսնում ենք, թե ներկայումս ինչ վիճակում է գտնվում Ռուսաստանը։ Այն շատ հյուծված է։
Ռուսաստանի համար գլխացավանք են դարձել «օկուպացիա» և «էթնիկ մաքրում» տերմինները։ Ռուսաստանը կարծում էր, թե մթության մեջ գողություն է կատարել, և ոչ ոք դա չի նկատել, սակայն պարզվեց, որ արդեն լուսանում է, և նրան բռնել են»։
Հիշեցնենք, որ այս տարվա նոյեմբերի 17-ին Եվրախորհրդարանը ձայների մեծամասնությամբ ընդունեց Վրաստանի վերաբերյալ բանաձևը, որում Վրաստանը նշված էր որպես ինքնիշխան երկիր և 3 անգամ գործածված էր «օկուպացիա» բառը, ինչպես նաև «էթնիկ մաքրում» արտահայտությունը։
Սաակաշվիլին դա որակել էր որպես պատմական՝ ընդգծելով. ««Օկուպացիա» բառը նախկինում գործածվել է ԵԽ-ի բանաձևում ու Եվրախորհրդարանի բանաձևերից մեկում։ Այն գործածել են նաև ԱՄՆ Կոնգրեսը, ԱՄՆ կառավարությունը և եվրոպական տարբեր երկրների կառավարություններ։
Սակայն առաջին անգամ Եվրոպայի ու աշխարհի ամենահեղինակավոր ու ներկայացուցչական ընտրական մարմինն օրինականացրեց այն, որ Վրաստանում առկա է Ռուսաստանի ապօրինի ռազմական օկուպացիա»։
