Ամերիկյան IT-հսկա Microsoft ընկերության ղեկավար Բիլ Գեյթսը բանակցություններ է վարում «չորրորդ սերնդի» միջուկային ռեակտորի մշակմամբ զբաղվող չինացի մասնագետների հետ: Այս մասին հաղորդում է The Wall Street Journal պարբերականը:
Նոր միջուկային ռեակտորի ստեղծման աշխատանքներով զբաղվում է Գեյթսի կողմից հատուկ ստեղծված TerraPower էներգետիկ ընկերությունը: Գեյթսի խոսքերով՝ ռեակտորի մշակման ժամանակ հիմնական շեշտը դրվում է այն բանի վրա, որպեսզի այն լինի «տնտեսող, շատ անվտանգ և շատ քիչ թափոններ ունենա»:
Ավելի վաղ Գեյթսի և Չինաստանի Ազգային միջուկային կորպորացիայի (CNNC) միջև բանակցությունների մասին հայտարարել էր այդ կազմակերպութան ղեկավար Սուն Ցինը:
«TerraPower-ը հիանալի երկխոսություն է վարում CNNC-ի և Չինաստանի կառավարության այլ ներկայացուցիչների հետ»,- մեջբերում է թերթը Գեյթսի խոսքերը: Այնուամենայնիվ, նա նշել է, որ նախագիծը գտնվում է մշակման նախնական փուլում:
TerraPower ընկերությունը 2006թ. սկսել է իրականացնել «վազող ալիքով ռեակտորի» (TWR), գաղափարը, որը թույլ է տալիս որպես վառելիք չօգտագործել հարստացված ուրանը: TerraPower-ի մասնագետները նախագծել են «վազող ալիքով միջուկային ռեակտորի» երկու տարբերակ՝ միջին և բարձր հզորության: Ընդ որում TWR-ն այնպես է նախագծված, որ առանց դադարի կարող է աշխատել առավելագույնը 100 տարի:
