Չինաստանի իշխանություններն այսօր հայտնել են, որ ոստիկանությունը երեխաների թրաֆիքինգով զբաղվող երկու տարբեր խմբավորումներ է բացահայտել, ինչի շնորհիվ ձերբակալվել են 608 կասկածյալներ և փրկվել 178 երեխաներ:
Հանրային անվտանգության նախարարությունը հայտնել է, որ դատախազները մեղադրյալների համար հայցեր են պատրաստում, որոնք դեռ պետք է ներկայացվեն դատարան:
Համացանցում տեղադրված նրանց հայտարարության մեջ ասվում է, որ 10 մարզերում 5000 տարբեր ոստիկաններ 6 ամիսների ընթացքում համագործակցել են հետախուզության հետ և անցած շաբաթ ձերբակալել են կասկածյալներին:
Associated Press-ը գրում է, որ երեխաների թրաֆիքինգը մեծ խնդիր է Չինաստանում, որտեղ տղամարդ ժառանգների նկատմամբ ավանդական նախապատվությունը և միայն մեկ երեխա ունենալու քաղաքականությունը պատճառ են դարձել, որ հատկապես տղա երեխաների թրաֆիքինգը հասնի մեծ թվերի:
Կանայք և աղջիկները նույնպես առևանգվում են և օգտագործվում որպես աշխատողներ կամ հարսնացուներ՝ չամուսնանած տղաների համար: Ամեն տարի կորչում են տասնյակ հազարավոր երեխաներ, որոնց ճշգրիտ թիվը գաղտնի է պահվում։
