РИА Новости-ի փոխանցմամբ, մոտ ժամանակներս Ադրբեջան է գործուղվելու Ռուսաստանի պաշտպանության փոխնախարար Անատոլի Անտոնովը։ Այս մասին հայտարարել է Ռուսաստանի պաշտպանության նախարարության մամլո քարտուղար, փոխգնդապետ Իրինա Կովալչուկը։
Վերջինիս խոսքերով, Անտոնովն Ադրբեջանում քննարկելու է Գաբալայի ռադիոտեղորոշիչ կայանի (ՌՏԿ) վարձակալության ժամկետի երկարաձգման հետ կապված և չկարգավորված հարցերը.
«Պլանավորված է մոտ ժամանակներս սկսել միջպետական բանակցություններ՝ Գաբալայի ՌՏԿ-ին առնչվող, չկարգավորված մնացյալ հարցերի վերջնական կարգավորման վերաբերյալ։ Այդ նպատակով որոշվել է Բաքու գործուղել ռուսական պատվիրակություն, որը գլխավորելու է Ռուսաստանի պաշտպանության փոխնախարար Անատոլի Անտոնովը»։
Հիշեցնենք, որ Գաբալայի ՌՏԿ-ի վարձակալության ժամկետը սպառվում է 2012 թվականին, և Ռուսաստանն ու Ադրբեջանը ցանկանում են այն երկարաձգել մինչև 2025 թվականը։
