ԱՄՆ-ում «Սև ուրբաթի» ժամանակ հրազենի վաճառքը ռեկորդային է եղել Հետաքննությունների դաշնային բյուրոյի այս ամբողջ ընթացքում անցկացրած վիճակագրության տվյալներով:
Ինչպես հայտնում է France-Presse գործակալությունը, 2011 թվականի նոյեմբերի 25-ին զենքերի խանութները վաճառել են 126166 տարբեր զենքեր: Հետաքննությունների դաշնային բյուրոյի տվյալներով՝ նախորդ ռեկորդը սահմանվել էր 2008 թվականին, երբ ամերիկացիները գնել էին 97848 ատրճանակ, ինքնաձիգ և հրացան:
Վաճառքի վիճակագրությունը հիմնված է մարդկանց ինքնությունը պարզելու հարցումների վրա, որոնք խանութի վաճառողները, ամերիկյան օրենսդրության համաձայն, ուղարկում են Հետաքննությունների դաշնային բյուրո: 2010 թվականի համեմատ, այս թիվը աճել է 32 տոկոսով, ընդ որում՝ ավելացել է առաջին անգամ զենք գնողների թիվը:
Հետաքննությունների դաշնային բյուրոյի աղբյուրը գործակալությանը հայտնել է, որ բյուրոն չի բացատրում զենքի պահանջարկի այդպիսի կտրուկ աճը:
Զենքի պահանջարկի աճը բացատրվում է նրանով, որ կանայք տարեցտարի ավելի շատ են ներգրավվում տարբեր սպորտաձևերի մեջ, որոնք կապ ունեն ատրճանակների կամ հրացանների հետ: