ԱՄՆ ոստիկանությունը հայտնել է, որ մայրը, ում մերժել են սոցիալական նպաստ տրամադրել, կառավարության սոցիալական ծառայությունների գրասենյակում 7 ժամ վեճի բռնվելուց հետո կրակել է իր երկու երեխաների վրա և ինքնասպան է եղել:
Լառեդո ոստիկանատան քննիչ Ջոե Բաեզան ասել է, որ 10-ամյա տղայի և 12-ամյա աղջկա առողջական վիճակը ծայրահեղ ծանր է:
Դեպքը տեղի է ունեցել երկուշաբթի օրը: Բաեզան ասել, է, որ երկու աշխատակիցների հետ խոսելիս կինը հանել է հրացանը և պահանջել է, կանչել տնօրենին: Երբ վերջինս եկել է, կարողացել է համոզել կնոջը, որ երկու աշխատակիցներին բաց թողնի: Միաժամանակ՝ 25 այլ աշխատակիցների տեղափոխել են ապահով վայր:
Կնոջ հետ բանակցել է ոստիկանությունը, որի արդյունքում կինը ազատ է արձակել նաև գրասենյակի տնօրենին, բայց հեռախոսազրույցի ավարտից հետո ոստիկանները երեք կրակոցի ձայն են լսել և, ներս մտնելով՝ տեսել են, որ կինը մահացել է և երկու երեխաները վիրավորված են:
Ոստիկանությունը հաղորդում է, որ կինը վերջերս էր տեղափոխվել Օհայո, և որ նրան մի քանի ամիս մերժել էին սոցիալական նպաստներ տրամադրել: Նա ոստիկանության հետ բանակցությունների ժամանակ ասել է, որ մի քանի անգամ բողոքներ է ուղարկել նահանգային և դաշնային գործակալություններին:
