Այս տարի դեկտեմբերի 24-27-ը Երևանում 5-րդ անգամ կանցկացվի «Ձմեռային փառատոն. Հայաստան»-ը:
Նախագիծն իրականացվում է 2007 թվից և նպատակ ունի նախատոնական ուրախ տրամադրություն ստեղծել Երևանում, Ամանորի և Սուրբ Ծննդյան տոնակատարությունների նոր ավանդույթ ստեղծել, գունավորել ձմեռային օրերը, ապահովել տոնական բարձր տրամադրություն, խթանել ձմեռային տուրիզմի զարգացումը Հայաստանում: Քանի որ դրսում ձմռանը քիչ միջոցառումներ են անցկացվում, փորձում ենք ստեղծել հավելյալ առիթ, որ մարդիկ դուրս գան իրենց բնակարաններից ու լավ ժամանակ անցկացնեն:
Այս մասին «Առաջին լրատվական»-ի հետ զրուցում ասաց փառատոնի կոորդինատոր Էդուարդ Լևանյանը:
Մեզ հետ զրույցում նա տեղեկացրեց, որ փառատոնի շրջանակում տեղի կունենան տոնածառերի ցուցադրություն Սիրահարների այգում (24-27-ը), մանկական խաղեր (դեկտեմբերի 25-26-ը), Ձմեռ պապերի մարաթոն, ձմեռային շքերթ: Միջոցառումները հիմնականում տեղի կունենան Երևանի փոքր կենտրոնում:
Ներկայումս փառատոնը մրցույթ է հայտարարել, որին կարող է մասնակցել ցանկացած կառույց, կազմակերպություն կամ անհատ ու պատրաստել իրենց «բնապահպանական տոնածառները»:
Նրա խոսքով` իրենց հայտարարության մեջ նշված են պայմանները, որոնք հիմնականում վերաբերում են չափերին, օգտագործվող նյութերին, իսկ հաղթողին սպասվում է հաճելի անակնկալ`երկօրյա հանգիստ «Բեսթ Վեսթերն Փարադայս Հոթել Դիլիջան» հյուրանոցում երկու անձի համար: Ինչ վերաբերում է Ձմեռ պապերի մրցույթին, Է. Լևանյանը նշեց, որ նրանք ընտրվելու են մրցույթի միջոցով` ընդամենը պետք է գրանցվել, ստանալ Ձմեռ պապի հագուստ ու արագաքայլ մրցույթին մասնակցել:
«Ով ամենից արագ հասավ նշանակետին, նա էլ կհայտարարվի հաղթող ու կստանա մեծ մրցանակ»,- հավելեց վերջինս:
Փառատոնը կմեկնարկի դեկտեմբերի 24-ին Ձմեռային շքերթով, որը կանցնի Սայաթ-Նովա, Աբովյա փողոցներով մինչև Հանրապետության հրապարակ:
«Ներկայում Երևանի քաղաքապետարանի հետ ճշտվում են մանրամասները, փորձում ենք քննարկել ու համաձայնեցնել ծրագրերը, գտնել օպտիմալ տարբերակներ»,- տեղեկացրեց Էդուարդ Լևանյանը:
Ձմեռային փառատոն կազմակերպելու նախաձեռնությունը պատկանում է Deem Communications ընկերությանը, որին 2008 թ. միացել է նաև «Կանաչաստան» ՀԿ-ն:
