Օհայոյի համալսարանի հետազոտողները վստահեցնում են, որ մեր Գալակտիկայում կարող են գտնվել Երկրի նման հսկայական մոլորակներ, որոնց 50 տոկոսը կազմված է ալմաստից: Այս մասին հաղորդում է РИА Новости-ն:
«Հնարավոր է, որ գոյություն ունեն Երկրից 15 անգամ ծանր մոլորակներ, որոնց կեսը կազմված են ալմաստներից»,-հայտարարել է հետազոտության հեղինակներից մեկը, որը իր կատարած աշխատանքների արդյունքները ներկայացրել է Սան Ֆրանցիսկոյում երկրաֆիզիկայի ամերիկյան միության կոնֆերանսի ժամանակ:
Հետազոտության ղեկավար Վենդրի Պաներոյի խոսքերով՝ այդ արդյունքները նշանակում են, որ այդպիսի ածխածնային մոլորակներում կարող է ձևավորվել միջուկ և մանթիա, ինչպես Երկրում: Սակայն նրանց միջուկը ավելի շատ ածխածին է պարունակելու, իսկ մանթիան բաղկացած է լինելու հիմնականում ածխածնից, մեծամասամբ՝ ալմաստի տեսքով:
Հետազոտության արդյունքում գիտնականները լաբորատորիայում ստեղծել են այն ջերմաստիճանը և ճնշումը, ինչ Երկրի ներքևի մանթիայում` պարզելու, թե ինչպես են ձևավորվում ալմաստները: Տվյալները ստանալով՝ նրանք կարողացել են կառուցել ինչպես Երկրի ընդերքում, այնպես էլ մոլորակներում, հանքանյութերի ձևավորման գործընթացի համակարգչային մոդելները:
Երկիրը կյանքի համար պիտանի է երկրաջերմային էներգիայի շնորհիվ, իսկ ալմաստները լավ են տանում ջերմությունը, ուստի ալմաստային մոլորակը պետք է արագ սառչի: Այդ պատճառով այդպիսի մոլորակում չի լինելու երկրաջերմային էներգիա, տեկտոնական շերտ, ինչպես նաև մթնոլորտ և մագիսական դաշտ:
«Մենք ենթադրում ենք, որ ալմաստային մոլորակը պետք է լինի շատ ցուրտ և մութ»,- ասել է Պաներոն:
