Օրերս հայաստանյան մամուլում տեղեկություններ հայտնվեցին այն մասին, որ Դուբայից վերադառնալուց հետո «Բարգավաճ Հայաստան» կուսակցության ղեկավար Գագիկ Ծառուկյանը նախագահականում բավական լարված հանդիպում է ունեցել Սերժ Սարգսյանի հետ: Ըստ այդ տեղեկությունների` Ծառուկյանը նախ Սարգսյանից պարզաբանում է խնդրել իր համախոհների նկատմամբ իրականացվող հետապնդումների կապակցությամբ, ինչին ի պատասխան՝ Սերժ Սարգսյանն ասել է, որ դա իրավական հարց է, և որ դրանով զբաղվում են իրավապահ մարմինները: Ի պատասխան՝ Ծառուկյանն ասել է, որ իր կուսակցությունը մտադիր է միայնակ մասնակցել խորհրդարանական ընտրություններին, ինչին Սերժ Սարգսյանը, ըստ տեղեկությունների, չի արձագանքել:
Հանրապետական կուսակցության փոխնախագահ, Ազգային ժողովում կուսակցության խմբակցության ղեկավար Գալուստ Սահակյանին այսօր «Առաջին լրատվական»-ը հարց ուղղեց, թե որքանո՞վ է տեղյակ այդ հանդիպման մանրամասներին, և ի՞նչ հնարավոր գործընթացներ կարող են ծավալվել այդ հանդիպման արդյունքում ներքաղաքական կյանքում:
«Այն, որ Գագիկ Ծառուկյանը միշտ էլ հնարավորություն ունի նախագահի հետ հանդիպելու` դա կարող ենք փաստել, բայց հանդիպում որպես այդպիսին, որը կարող էր քաղաքական լինել, կարծում եմ, որ դա մշտապես ավելի բաց է լինում: Համենայնդեպս, այդ կոնտեքստում ոչ միայն ինֆորմացված չեմ, այլև չեմ կարծում, որ էական հանդիպում տեղի ունեցած կլինի, որը կներազդի մեր քաղաքական դաշտի գործընթացների վրա: Իսկ որպես անձինք` բնականաբար բոլորս էլ բոլորի հետ հանդիպում ենք»,- հայտարարեց Գալուստ Սահակյանը:
