Այսօր ԱԺ հերթական քառօրյա նիստում «Մասնավոր պահնորդական գործունեության մասին» ՀՀ օրենքի նախագծի քննարկման ժամանակ ՀՀ ոստիկանապետի տեղակալ Արթուր Օսիկյանը նշեց, որ օինագծով պետական պաշտոնյաները իրավունք չունեն պահնորդական ծառայություններից օգտվել: Ըստ նրա՝ օրինագիծը համապատասխանում է անվտանգության բնագավառում կառավարության քաղաքականությանը:
«Մեր առաջարկությունների 90%-ը տեղ է գտել օրինագծում, բայց կան որոշ խնդրահարույց հարցեր, որոնք առաջինից երկրորդ ընթերցում կքննարկիվեն»,- նշեց Ա.Օսիկյանը՝ հավելելով, որ օրինակ պահնորդական գործունեությունն իր բնույթով առնչվում է հասարակությանը, պետք են երաշխիքներ, որ կբացառեն քրեականացումը, կոռումպացումը:
Փոխոստիկանապետը կարևորեց անցումային դրույթների մշակումը: Նրա խոսքով, պահնորդները և թիկնապահները համապատասխան որակավորում պետք է ստանան, բայց այս ուղղությամբ մինչ օրս ոչ մի կրթական ծրագիր չի իրականացվում. «Օրենքի ընդունումից հետո օրենսդրական բաց կունենանք այս առումով»: Նա նշեց, որ հանցավորության դեմ պայքարի բնագավառում մասնավոր և պետական պահնորդական համագործակցությունը նույնպես օրենսդրական հիմք պետք է ունենա, այլապես կյանքում կիրառելի չի կարող համարվել: Օրենքը ասում է, որ մեկ անձը չի կարող 2 կազմակերպության հիմնադիր լինել:
ՀՀԿ-ական պատգամավոր Ռաֆիկ Պետրոսյանն առաջարկեց օրենքը կոչել «Թիկնապահական և պահնորդական գործունեության մասին» օրենք, քանի որ դրա մեծ մասը վերաբերում է թիկնապահական գործունեությանը: Նա առաջարկեց բացառել դատված անձանց պահնորդ աշխատելու հնարավորությունը. «Ունենալով քրեական անցյալ՝ անձը չի կարող պահնորդ աշխատել, և պետք է հանել դատվածության ժամկետն անցնելու վերաբերյալ կետը»: Ռ.Պետրոսյանի դիտարկմամբ՝ նաև հատուկ համազգեստի վրա պետք է նշվի ֆիրմայի անվանումը, բայց դրա վրա չի կարող լինել ապրանքային նշան, քանի որ գործ ունենք մարդկանց հետ և ոչ ապրանքի:
Նիստի ժամանակ պատգամավորներն առաջին ընթերցմամբ ընդունեցին Ստանդարտացման մասին օրինագծերի փաթեթը:
Ի դեպ, այսօր «Բաց դռներ» ծրագրի շրջանակում ԱԺ են այցելել Արագածոտնի մարզի Օշականի Մեսրոպ Մաշտոցի անվան դպրոցի մի խումբ աշակերտներ և ուսուցիչներ: