Ադրբեջանական APA լրատվական գործակալության փոխանցմամբ՝ Ադրբեջանում ԵՄ-ի ներկայացուցչության ղեկավար Ռոլանդ Կոբիան Բաքվում տեղի ունեցած «Պետական արդյունավետ ղեկավարում. ժամանակի մարտահրավերներ» խորագրով միջազգային կոնֆերանսում ունեցած իր ելույթում հայտարարել է, որ Ադրբեջանը լավ հնարավորություններ ունի Եվրոպայի մի մասնիկը դառնալու.
«Յուրաքանչյուր պետության ուժը կախված է նրա պետական ղեկավարումից։ Պետությունը պետք է որպես հիմք ընդունի ժողովրդավարությունն ու մարդու իրավունքները։ Մենք տեսնում ենք, որ Ադրբեջանն «աշխատում» է այդ ուղղությամբ։
Պետության հիմնական նպատակը պետք է լինի կոռուպցիայի դեմ պայքարի նպատակն ու թափանցիկությունը։ Դա վերաբերում է ոչ միայն Ադրբեջանին, այլև եվրոպական երկրներին։ Մենք տեսնում ենք, որ Ադրբեջանին դա «հաջողվում» է։
Հնարավոր է՝ դա առաջին հայացքից շատ բարդ է թվում, սակայն մենք՝ Եվրոպան ու Ադրբեջանը, կարող ենք հասնել այդ նպատակին։ Եվրոպայում Ադրբեջանի հանրաճանաչությանը նպաստում է հաջորդ տարի Բաքվում կայանալիք «Եվրատեսիլ 2012» երաժշտական մրցույթի անցկացումը։ ՄԱԿ ԱԽ-ին Ադրբեջանի ոչ մշտական անդամակցությունը նույնպես նպաստում է Եվրոպայում Ադրբեջանի հանրաճանաչության աճին։ Ադրբեջանը քայլ առ քայլ մոտենում է Եվրոպային»։
Հիշեցնենք, որ Transparency International միջազգային կազմակերպության վերջին «կոռուպցիոն» զեկույցը վկայել էր, որ Ադրբեջանը շարունակում է մնալ ամենակոռումպացված երկրներից մեկը։ Զեկույցում Ադրբեջանը 183 երկրների թվում 2.4 բալով հանգրվանել էր 143-րդ հորիզոնականում։
