Եգիպտոսի իշխանությունները հրապարակել են երկրում կայացած խորհրդարանական ընտրությունների առաջին փուլի արդյունքները: Ինչպես հաղորդում է BBC-ն, Կենտրոնական ընտրական հանձնաժողովի նախագահ Աբդել Իբրահիմի ելույթը քիչ հստակություն է մտցրել ընդհանուր պատկերի մեջ: Նա հայտարարել է, որ միայն 4 անկախ թեկնածուների է հաջողվել ուղղակիորեն մտնել խորհրդարան: Պատգամավորական մյուս մանդատների թեկնածուները չեն հավաքել ձայների 50%-ը, որն անհրաժեշտ է առաջին փուլում հաղթանակի համար, և պայքարը կշարունակեն հաջորդ փուլում:
Ընտրական հանձնաժողովի տվյալներով, քվեարկությանը մասնակցել է ընտրողների 62%-ը: Պաշտոնյան նշել է, որ «փարավոնների ժամանակներից» սկսած սա ամենազանգվածային մասնակցությունն է ընտրություններին:
Դիտորդների կանխատեսումներով, հաղթանակ կտանի Հոսնի Մուբարաքի ժամանակ արգելված «Մուսուլման եղբայրներ» իսլամիստական կազմակերպությունը: Սպասվում է, որ կազմակերպության քաղաքական թևը՝ «Ազատության և արդարության կուսակցությունը», կհավաքի ձայների 30%-ը: Բացի այդ, իսլամիստները հույս ունեն, որ առնվազն 10% ձայն կստանան իրենց համախոհները, որով նրանք հաջողության դեպքում կարող են կոալիցիա կազմել:
Մյուս քաղաքական բլոկը՝ «Ալ-Նուր» կուսակցությունը, ամենայն հավանականությամբ կհավաքի ձայների 20%-ը: Այս կուսակցությունը միավորում է իսլամի պահպանողական համախոհներին. նրանք պահանջում են կանանց և քրիստոնյաներին զրկել ղեկավար պաշտոններ զբաղեցնելու իրավունքից, հանդես են գալիս ալկոհոլը և խառը լողափերն արգելելու օգտին:
Այնուամենայնիվ, BBC-ն նշում է, որ Եգիպտոսում ընտրական դաշտը շատ հեշտ և արագ կարող է փոխվել:
Եգիպտոսում ընտրական համակարգը բավականին բարդ է. այն տեղի է ունենում 3 փուլով և կձգվի մինչև 2012 թ. մարտը:
Առաջին փուլում մեկ ամսվա ընթացքում տեղի կունենան խորհրդարանի ստորին պալատի՝ Ժողովրդական ասամբլեայի պատգամավորների ընտրությունները: Պատգամավորական մանդատների երկու երրորդի ճակատագիրը կորոշվի համամասնական ընտրական համակարգով, մյուսը՝ մաժորիտար:
Եգիպտոսում ընտրություններն ուղեկցվում են զանգվածային զույցերով: Ակցիայի մասնակիցները մտավախություն ունեն, որ Զինված ուժերի բարձրագույն խորհուրդը չի պատրաստվում իշխանությունը հանձնել քաղաքացիական կառավարությանը և փորձում է այն պահել իր ձեռքում:
