Թուրքական Anadolu գործակալության փոխանցմամբ՝ եռօրյա ացով Իրաքից Թուրքիա ժամանած ԱՄՆ փոխնախագահ Ջոզե Բայդենը երեկ Անկարայում նախ հանդիպում է ունեցել Թուրքիայի Ազգային մեծ ժողովի (ԹԱՄԺ) նախագահ Ջեմիլ Չիչեքի, ապա նաև նախագահ Աբդուլլահ Գյուլի հետ։
Աբդուլլահ Գյուլի հետ ունեցած մոտ 2 ժամանոց հանդիպման ժամանակ Բայդենը, երկկողմանի հարաբերություններից բացի, քննարկել է Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) դեմ պայքարի, Իրաքի ապագայի, Սիրիայի, Իրանի, Կիպրոսի, Իսրայելի և վերջապես հայ-թուրքական հարաբերությունների կարգավորման հարցերը։
Բայդենը մտահոգություն է հայտնել, որ Իրաքից ամերիկյան զորքերի դուրս բերումից հետո Իրանի ազդեցությունը կարող է մեծանալ այդ երկրում, և այդ պլանում Բայդենը կարևորել է Թուրքիայի դերակատարությունը։
PKK-ի հետ կապված՝ Բայդենը հայտարարել է, որ ԱՄՆ-ը Թուրքիային աջակցում է այդ հարցում։ 2012 թվականին այդ աջակցությունն ու համագործակցությունն առավել է ուժեղացվելու։ Նա Գյուլին հավաստիացրել է, որ իրաքյան իշխանությունները հավատարիմ են մնում PKK-ի դեմ պայքարի հարցում։
Սիրիայի վերաբերյալ Բայդենն ու Գյուլը քննարկել են այդ երկրի ապագան՝ Ասադի ռեժիմի տապալումից հետո՝ ընդգծելով, որ Ասադի ռեժիմի պատճառով Սիրիայում և ոչ միայն Սիրիայում ստեղծվել է անկայուն իրավիճակ։
Իրանի հարցում Բայդենը կարևորել է այդ երկրի տարածաշրջանային ազդեցության նվազեցմանն ուղղված քայլերը։ Բացի այդ, քննարկվել են Իրանի միջուկային ծրագրի հարցը, Վաշինգտոնում Սաուդյան Արաբիայի դեսպանի դեմ Իրանի հատուկ ծառայությունների կազմակերպած մահափորձը, ինչպես նաև Թուրքիայի տարածքում ՆԱՏՕ-ի ռադիոտեղորոշիչ կայանի տեղակայումն ու դրանից բխող իրանական սպառնալիքների հարցը։
Նշվում է, որ կողմերը չեն քննարկել Սիրիայում միջազգային բուֆերային գոտու ձևավորման և Իրանի դեմ պատժամիջոցների սահմանման հարցերը։
Բայդենը հույս է հայտնել, որ ՄԱԿ-ի միջնորդությամբ առաջիկա ամիսներին առաջընթաց կգրանցվի Կիպրոսի հարցում։
Բայդենը խորապես կարևորել է թուրք-իսրայելական հարաբերությունների կարգավորման հարցը՝ ընդգծելով, որ Թուրքիան ու Իսրայելն ԱՄՆ-ի ամենամոտ երկու բարեկամ ու գործընկեր երկրներն են։ Բայդենը հույս է հայտնել, որ Թուրքիան ու Իսրայելը քայլեր կձեռնարկեն այդ ուղղությամբ, քանի որ նրանց միջև առկա լարվածությունը վնասում է երկու երկրներին էլ։
Հայ-թուրքական հարաբերությունների կարգավորման հարցին Բայդենն անդրադարձել է թե՛ Ջեմիլ Չիչեքի, թե՛ Աբդուլլահ Գյուլի հետ իր հանդիպումներում։ Բայդենն իր գոհունակությունն է հայտնել հայ-թուրքական արձանագրությունների՝ ԹԱՄԺ-ի օրակարգ վերադարձվելու կապակցությամբ։ Բայդենը հույս է հայտնել, որ ԹԱՄԺ-ն տվյալ ուղղությամբ քայլ կձեռնարկի։
Հիշեցնենք, որ այս տարվա սեպտեմբերի 24-ին Թուրքիայի Նախարարների խորհուրդը ԹԱՄԺ-ի օրակարգ էր վերադարձրել օգոստոսի 22-ին անվավեր ճանաչված հայ-թուրքական արձանագրությունները:
