Շաբաթ օրը ԱՄՆ նախագահական թեկնածու Հերման Քեյնն իր աջակիցներին և դոնորներին հանդիպման է հրավիրել Ատլանտա, որտեղ նրանց կհայտնի, թե արդյոք պատրաստվո՞ւմ է շարունակել քարոզարշավը, թե՝ ոչ: Այս մասին հայտնում է Post Politics-ը:
Նրա աջակիցներից մեկը, ում հետ Քեյնն առանձին հանդիպում է ունեցել, ասել է, որ նա հավանաբար կհանի թեկնածությունը:
Իսկ մեկ այլ աջակից, ով Քեյնի հետ հանդիպել է այս առավոտյան, ասել է, որ թեկնածուն ընդամենը ցանկանում է հանդիպել իր աջակիցների հետ՝ նրանց շնորհակալություն հայտնելու համար:
Հիշեցնենք, որ Հանրապետական թեկնածուին, ըստ հարցումների արդյունքների, համարում էին նորություն բերող քաղաքական գործիչ։ Սակայն նրա քարոզարշավը սկսեց անկում ապրել, երբ նա մեղադրվեց Ազգային ռեստորանների ասոցիացիայի ղեկավար աշխատելիս մի քանի կանանց նկատմամբ սեռական ոտնձգություն կատարելու մեջ։
Իսկ ավելի վաղ Ջինջեր Ուայթ անունով մի կին հայտնել էր, որ Քեյնի հետ 13 տարի սիրային կապի մեջ է եղել: