Այս տարի փառատոնին ներկայացվել է 9 հայտ, որոնցից 2-ը մարզային թատրոններից (Գյումրի, Վանաձոր), իսկ ցուցադրվել են դրանցից 8-ը: Թատերասեր հանրության դատին հանձնվել են երիտասարդ ռեժիսորներ Գոռ Մարգարյանի, Զարուհի Անտոնյանի, Հենրի Քոչարյանի, Լյուդվիգ Հարությունյանի, Սարգիս Մանուկյանի և այլոց աշխատանքները: Ներկայացումներից հետո եղել են թատերական քննարկումներ:
Փառատոնի շրջանակներում ներկայացված աշխատանքների հեղինակներից մի քանիսը կմասնակցեն Մոսկվայում կայանալիք ամառային դասընթացներին: ՀԹԳՄ քարտուղար Սոնա Մելոյանը հավաստիացրեց, որ հայ թատրոնը ունի կայուն ապագա: «Այսպիսի ներկայացումներ դեռևս չեն եղել: Տարբեր ժանրերով ցուցադրված 8 ներկայացումները ներկայացվել են շատ բարձր պրոֆեսիոնալ մակարդակով, և վստահաբար կարելի է ասել, որ մեր երիտասարդ ռեժիսորները ընկալում են թատրոնի տեխնիկան, լեզուն, իսկ ամենակարևորը`ռեժիսորները դրսևորում են իրենց ժամանակակից մոտեցմամբ: Ինչ վերաբերում է մասնակիցներին, ապա նրանց մեջ մրցակցություն ընդհանրապես չի եղել»,- նշեց նա ու հավելեց, որ մասնակիցներից յուրաքանչյուրն էլ արժանի է լավագույն գնահատականի:
Մելոյանի կարծիքով` փառատոնը լայն հնարավորություն է ընձեռում երիտասարդներին իրենց ցուցաբերելու նաև արտերկրում: «Հատուկ դասընթացները մեր երիտասարդներին հնարավորություն են տալիս նաև հանդես գալու արտերկրում, իսկ դա շատ կարևոր ձեռքբերում է»,- ավելացրեց նա: