«Մուդիս»-ի կողմից Հայաստանի վարկանիշի իջեցումը «կայուն»-ից «բացասական»-ի արտառոց չէ և մեր երկրի համար էական ազդեցություն չի ունենա: Այսօր լրագրողների հետ հանդիպմանը նման հայտարարություն արեց էկոնոմիկայի նախարար Տիգրան Դավթյանը: Նրա խոսքով` Հայաստանը «բավականին մակարդակով» աշխատում է աշխարհի 3 հեղինակավոր վարկանիշային կազմակերպություններից 2-ի` «Մուդիս»-ի և «Ֆիտչ»-ի հետ:
Տ. Դավթյանի խոսքով` ՀՀ վարկանիշի նվազեցումը պայմանավորված է այն ռիսկերով, որ առաջացել են աշխարհում, հատկապես Եվրոպայում, ինչը, բնականաբար, որոշակի մտավախություն է առաջացնում զարգացման միտումների առումով. «Սա ճշգրտում է: Մեր վարկանիշը բավականին պատշաճ վիճակում է»:
Պատասխանելով «Առաջին լրատվական»-ի հարցին` վարկանիշի փոփոխությունը հնարավոր ներդրումների հետ կապված խնդիրներ չի՞ առաջացնի, Տ. Դավթյանը պատասխանեց` եթե բացասական վարկանիշը երկար ժամանակ պահպանվի, դա այլ բան է, բայց այս պարագայում էական ազդեցություն չի ունենա ներդրումային ծրագրերի վրա, քանի որ դրանք բավականին երկարաժամկետ են:
Նախարարը տնտեսական տարին «հաջողված» համարեց. «Դրական զարգացումներ են ակնկալվում, մինչև տարեվերջ դեռ մեկ ամիս կա, և դեկտեմբերը բավականին ակտիվ ամիս է»:
Տնտեսության տարեկան աճը, նախարարի կարծիքով, կլինի 5%, ընդ որում` իրական հատվածի աճ է գրանցվել արդյունաբերության (12-13%), ներդրումների, զբոսաշրջության (13%), գյուղատնտեսության ոլորտներում: Տ. Դավթյանը շինարարության անկմանը բացասական գնահատական չտվեց, այն բնական համարեց:
