ՀՀ ԱԳՆ մամլո գրասենյակից «Առաջին լրատվականիn տեղեկացնում են, որ նոյեմբերի 26-ին Նիդեռլանդների Լիմեն քաղաքում տեղի է ունեցել Սպիտակ-Լիմեն քույր քաղաքների 10-ամյա հոբելյանին նվիրված միջոցառում:
Միջոցառմանը ելույթով հանդես է եկել Նիդեռլանդների Թագավորությունում ՀՀ դեսպան Ձյունիկ Աղաջանյանը:
Իր խոսքում ՀՀ դեսպանը շնորհակալություն է հայտնել Սպիտակ-Լիմեն քույր քաղաքների հանձնախմբերին անցած 10 տարիներին իրականացված աշխատանքների համար, հատկապես առողջապահության բնագավառում:
Ձ. Աղաջանյանը կարևորել է երկու ժողովուրդների միջև մարդկային անմիջական շփումները, որոնք սկիզբ են առել Սպիտակի համար դժվարին մի ժամանակահատվածում, երբ երկրաշարժի հետևանքներին ու տնտեսական դժվարություններին դիմագրավող սպիտակցիների համար օգնության ու բարեկամության ամեն մի պարզված ձեռք հույսի նոր ալիք էր ներարկում:
Դեսպանը հույս է հայտնել, որ երկու քաղաքների միջև հարաբերություններն ավելի կխորանան` ընդգրկելով նորանոր ոլորտներ ու ծրագրեր:
Միջոցառմանը ներկա են եղել նաև Սպիտակ-Լիմեն քույր քաղաքների հանձնախմբերի նախագահները, հանձնախմբերի կողմից իրականացված ծրագրերին մասնակցած անձինք և հոլանդահայ համայնքի ներկայացուցիչներ: