Իրանական ISNA լրատվական գործակալության փոխանցմամբ՝ Իրանի նախագահ Մահմուդ Ահմադինեժադը հայտարարել է, որ Արևմուտքի նոր պատժամիջոցները բարդացնում են Իրանի միջուկային ծրագրի վերաբերյալ բանակցությունների սկսումը.
«Նրանք (արևմտյան երկրները) իրենց համար ստեղծում են սահմանափակումներ։ Մենք մշտապես բարձրաձայնել ենք, որ պատրաստ ենք բանակցությունների ու համագործակցության։ Բանակցությունները հակամարտությունից ավելի լավ են, սակայն թվում է, թե նրանք այլ մտադրություններ ունեն՝ շարունակ ձգտելով հակամարտության։
Ինչպե՞ս է Արևմուտքը պատկերացնում Իրանի հետ բանակցություններ սկսելը, երբ հակաիրանական բանաձևեր է ընդունում ու հակաիրանական պատժամիջոցներ սահմանում։ Մինչդեռ միջազգային հարցերի մեծ մասի լուծման վերաբերյալ Ռուսաստանի ու Չինաստանի դիրքորոշումները համընկնում են Թեհրանի դիրքորոշման հետ։
Նրանց դիրքորոշումներն առավել մոտ են կանգնած մեր դիրքորոշմանը։ Մենք համագործակցում ենք Մոսկվայի ու Պեկինի հետ, սակայն մենք չենք կարող ակնկալել, որ նրանք իրեն ազգային շահերը կզոհաբերեն հանուն մեզ»։
Հիշեցնենք, որ այս տարվա նոյեմբերի 9-ին Իրանի միջուկային ծրագրի վերաբերյալ ԱԷՄԳ-ի զեկույցի հրապարակումից հետո Ահմադինեժադը հայտարարել էր, որ իրենք ոչ մի հետքայլ չեն անելու իրենց միջուկային ծրագրի հարցում։
