Հանրային խորհրդի անդամ, Հայաստանի քրիստոնեադեմոկրատական միության ղեկավար Խոսրով Հարությունյանն «Առաջին լրատվական»-ի հետ զրույցում նշեց, որ բյուջեի ծախսերը պետք է գնահատել մի քանի սկզբունքով՝ սոցիալական բլոկի (առողջապահություն, գիտություն, կրթություն, սոցիալական և այլ) ծախսեր, ՀՆԱ-ում աճ ունեցել են, թե չէ, բյուջեի հնարավորություները ռեալ սեկտորում տնտեսական ակտիվությունը խթանելու առումով և այդ առումով հարկային եկամուտների տեսակարար կշռի աճը ՀՆԱ մեջ և անկասկած՝ դեֆիցիտի սպասարկման աղբյուրները:
«Անկասկած, այս կոնտեքստում կամ այս հարցադրումների ենթատեքստում, եթե փորձում ենք վերլուծել 2012 թ. բյուջեն, ապա կարելի է ասել, որ փորձ է արվում առավելագույնս հավաքագրել հնարավորությունները այս ուղղություններով խնդիրները լուծելու համար: Ընդ որում՝ պետք է հաշվի առնել, որ անթաքույց կառավարությունը խնդիր է դնում ՀՆԱ-ում հարկերի տեսակարար կշիռն ավելացնելու»,- ասաց Խ. Հարությունյանը՝ հավելելով, որ 101 մլրդ դրամ հավելումից հարկերի դրույքաչափերի փոփոխման արդյունքում ընդամենը 14-15 մլրդ դրամով է ապահովվում, մնացածն ապահովվելու է հիմնականում ստվերային տնտեսության կրճատման հաշվին:
Այս հանգամանքը նա օգտակար անվանեց սոցիալական բևեռացումը մեղմելու տեսանկյունից. «Բյուջեն իրատեսական է: Իշխանությունը փորձում է առավելագույնս մոբիլիզացնել հնարավորությունները սոցիալական խնդիրները լուծելու համար»:
