Քառասունհինգ րոպե առաջ սկսվել է ՀՀԿ քաղխորհրդի նիստը, որի օրակարգը բաղկացած է երկու կետից: Առաջին կետը վերաբերում է Երևանի նախկին քաղաքապետ Գագիկ Բեգլարյանին. հանրապետականները քննարկում են, թե ինչպես է պետք վարվել նրա հետ: Խոսքը մասնավորապես վերաբերում է նախկին քաղաքապետի հնարավոր քայլերին և դրանք կանխող միջոցներին: Հանրապետականների ամենալուրջ «հակաքայլը» քրեական գործի հարուցումն է, որի մասին տեղյակ է Գագիկ Բեգլարյանը:
Օրակարգի երկրորդ հարցը վերաբերում է Երևանի հաջորդ քաղաքապետի ընտրությանը: Այսօր Սերժ Սարգսյանն իր կուսակիցներին ներկայացնելու է այն մարդու անունը, ում ինքն ուզում է տեսնել քաղաքապետի պաշտոնում: Հիշեցնենք, որ մեր լավատեղյակ աղբյուրների փոխանցմամբ, Սերժ Սարգսյանն արգելել էր իր մերձավոր շրջապատին խոսել քաղաքապետի այս կամ այն թեկնածուի մասին: ՀՀԿ ղեկավարի նախընտրելի թեկնածուն, ըստ ամենայնի, «Հայռուսգազարդ» ընկերության տնօրեն Կարեն Կարապետյանն է: