Հայաստանյան լրատվամիջոցներից մեկում հրապարակված «Զանգվածային ծառահատումներ Օձուն-Արևածագ ճանապարհին» վերտառությամբ հոդվածի հետքերով, Լոռու մարզի դատախազը համապատասխան մարմիններին հանձնարարել է ստուգել այնտեղ նշվող հանգամանքները:
Հոդվածում նշվում է Լոռու մարզի Օձուն-Արևածագ ճանապարհահատվածում շուրջ 200 ծառերի ապօրինի հատման, այն կանխելու, արձանագրելու և բացահայտելու ուղղությամբ պատկան մարմինների կողմից միջոցներ չձեռնարկելու մասին, կից կան նաև լուսանկարներ:
Ինչպես հաղորդում է «Արմենպրեսը», ՀՀ ոստիկանության Թումանյանի բաժնի պետ Ա. Հարությունյանին հանձնարարվել է ստուգել վերոնշյալ հանգամանքները:
Ոստիկանության Լոռու մարզային վարչության պետ Ա. Համբարյանին հանձնարարվել է հսկողություն իրականացնել նյութերի նախապատրաստման, ձեռնարկվող օպերատիվ միջոցառումների նկատմամբ, իսկ հոդվածում նշված հանգամանքերը հիմնավորելու դեպքում հիշյալ տարածքը սպասարկող ոստիկանության աշխատակիցների նկատմամբ իրականացնել ծառայողական քննություն և արդյունքները տրամադրել վարույթն իրականացնողին: