Այսօր Վրաստանի պատվիրակությունը մեկնել է Ժնև, որտեղ դեկտեմբերի 16-ին նախատեսված է Անդրկովկասի անվտանգության և կայունության հարցերին նվիրված բանակցությունների հերթական՝ 14-րդ փուլը: Հանդիպմանը վրացական կողմը կգլխավորի Վրաստանի ազգային անվտանգության քարտուղար Գիգի Բոկերիան:
Ավելի վաղ Թբիլիսիում կայացած ճեպազրույցում Վրաստանի ԱԳ փոխնախարար Նինո Կալանդաձեն հայտնել էր, որ անվտանգության և փախստականների վերադարձի հետ կապված ավանդական հիմնախնդիրներից բացի՝ հերթական փուլի ընթացքում կքննարկվեն նաև լրացուցիչ հարցեր: «Նախևառաջ վրացական կողմը Ժնևում կառաջադրի օկուպացիոն գծի տեղափոխման, Ցխինվալի տարածաշրջանում Ռուսաստանի կողմից «Սմերչ» համակարգի տեղակայման հարցերը, ինչպես նաև վերջերս Վրաստանի տարածքում իրականացված պայթյունները: Վրացական կողմը ծրագրում է ուշադրություն դարձնել բռնազավթված տարածքում մշակութային հուշարձանների ոչնչացման փաստերի և Ախալգորիի շրջանում էթնիկ վրացիների սեփականության իրավունքների հիմնախնդրի վրա»,-ասել էր Կալանդաձեն: «Հակառակ ամեն ինչի՝ մենք լավատեսորեն ենք տրամադրված ժնևյան բանակցություններին: Մենք ակտիվորեն մասնակցում ենք այդ ձևաչափով անցկացվող հանդիպումներին: Մենք ցանկանում ենք պահպանել այդ ձևաչափը, չնայած առայժմ առաջընթացը բացակայում է»,-հավելել է փոխարտգործնախարարը, հայտնում է Грузия Online-ը:
Ի դեպ, ըստ գործակալության`
Միացյալ Նահանգների պետքարտուղարի եվրոպական և եվրասիական հարցերով տեղակալ Ֆիլիպ Գորդոնը կմասնակցի ժնևյան բանակցություններին:
