Ռուսական կայսերական ընտանիքի ավելի քան 300 բացառիկ և նախկինում չհրապարակված նկարներ աճուրդի են հանվել:
Ինչպես հայտնում է ИТАР-ТАСС գործակալությունը, Ժնևի աճուրդի տանը դեկտեմբերի 12-ին ցուցադրվելու են բացառիկ նկարներ, որոնցից շատերը ստորագրված են ռուսական կայսերական ընտանիքն անդամների կողմից:
Լուսանկաներն ընդգրկված էին Ռոմանովների ընտանիքի դաստիարակ և ուսուցիչ Ֆերդինանտ Թորմեյերի (1858-1944) մասնավոր հավաքածուում: Շվեցարացին երեք տարի եղել է արքայազն Նիկոլայ Ալեքսանդրովիչի և Մեծ Իշխան Գեորգի Ալեքսանդրովիչի ուսուցիչը: Թորմեյերը նրանց դասավանդել է ֆրանսերեն և գրականությունը:
Վերադառնալով հայրենիք` Ֆերդինանտ Թորմեյերը պահպանել է իր կապերը կայսերական ընտանիքի հետ: Ուսուցչի կողմից հավաքված լուսանկարների երկու ալբոմում զետեղված են Ալեքսանդր III ցարի, Մարիա Ֆեոդորովնա կայսրուհու և նրանց երեխաների, Նիկոլայ II-ի և ռուսական կայսրության վերջին իշխանների ու իշխանուհիների պաշտոնական և ամենօրյա նկարներ: Ալբոմում կան նաև Մեծ իշխան Միխայիլ Ալեքսանդրովիչի, ինչպես նաև նրա ավագ եղբոր նկարները:
Հավաքածուն գնահատվում է 25-30 հազար ֆրանկ:
«Մինչ այժմ չհրապարակված և աննախադեպ հավաքածուի բացահայտումը մեծ նշանակություն ունի պատմության համար, այն կգրավի ռուսական արվեստի սիրահարների ուշադրությունը, ինչպես դա եղավ 2010 թվականի դեկտեմբերին»,- ասել է աճուրդի տան տնօրեն Բեռնար Պիգեն:
2010 թվականին աճուրդի էին հանվել Թորմեյերին ուղղված՝ Մեծ իշխաններ Գեորգիի և Միխայիլի, ինչպես նաև իշխանուհիներ Քսենիա և Օլգա Ռոմանովնաների նամակները, հեռագրերը, բացիկները և նկարները: Հարյուրավոր փաստաթղթեր պահվել են Թորմեյերի տան տանիքում գտնվող մաշված ճամպրուկի մեջ այնքան ժամանակ, մինչև նոր տերերը որոշել են վաճառել այդ թղթերը: Աճուրդի գումարը կազմել էր 385 հազար ֆրանկ, մինչդեռ հավաքածուն սկզբնապես գնահատվում էր 70-100 հազար ֆրանկ: