ИТАР-ТАСС-ի փոխանցմամբ՝ ԱՄՆ-ի վարչակազմը նոր պատժամիջոցներ է սահմանել Իրանի նկատմամբ։ Խոսքը Իրանի նավթաքիմիական ոլորտի հետ կապված 11 ընկերությունների ու մասնավոր անձանց մասին է։ Այս մասին ասվում է նախագահ Բարաք Օբամայի հայտարարության մեջ։
Դրանում մասնավորապես նշված է. «Իմ վարչակազմը քայլեր է ձեռնարկել՝ ավելացնելու գինը, որ Իրանը վճարում է իր գործողությունների համար։ Նոր պատժամիջոցներն առաջին անգամ ուղղված են Իրանի նավթաքիմիական ոլորտին։ Դրանք արգելում են տվյալ ոլորտի մատակարարումը ապրանքներով, ծառայություններով ու տեխնոլոգիաներով, ինչպես նաև պատժամիջոցներ են սահմանում յուրաքանչյուրի նկատմամբ, ով կներգրավվի այդ գործունեության մեջ։
Պատժամիջոցները վերաբերում են 11 մասնավոր անձանց ու ընկերությունների, որոնք իրենց դերակատարությունն են ունեցել Իրանի միջուկային ծրագրի զարգացման գործում, այդ թվում՝ նաև ուրանի հարստացման հարցում։
Բացի այդ, որոշ պատժամիջոցներ են սահմանվել Իրանի էներգետիկ ոլորտի նկատմամբ, որոնք կդժվարացնեն Իրանի նավթագազային ոլորտի արդիականացումը։ Այս ամենի հետ մեկտեղ մենք առաջին անգամ Իրանի ողջ բանկային հատվածը՝ ներառյալ Իրանի Կենտրոնական բանկը, որակել ենք որպես նրա հետ համագործակցող կառավարությունների կամ ֆինանսական ինստիտուտների սպառնալիք։
Մասնավորապես, ԱՄՆ պետդեպարտամենտը պատժամիջոցներ է սահմանել իրանական «Սուրեհ», «Նուր Աֆզար Գոստար», Ֆուլմեն գրուպ» և «Յասա պարտ» կոնցեռնների նկատմամբ, որոնք կասկածվում են իրանական միջուկային ռեակտորների համար վառելիքի արտադրության, ուրանի հարստացման նյութերի տրամադրման և միջուկային զենքի ու բալիստիկ հրթիռների մշակման համար անհրաժեշտ նյութերի ու տեխնոլոգիաների տրամադրման մեջ»։
