Ռուսական Regnum լրատվական գործակալության փոխանցմամբ՝ ԱՄՆ Սենատը պետք է մինչև այս տարեվերջ լուծի Ադրբեջանում ԱՄՆ դեսպան Մեթյու Բրայզայի գործունեության երկարաձգման հարցը, ինչին դեմ է հանդես գալիս ԱՄՆ հայկական լոբբին, որը պահանջում է հետ կանչել Բրայզային։ Այս մասին հայտնում են դիվանագիտական աղբյուրները։
Նրանք նշում են. «Հաշվի առնելով, որ 2012 թվականին ԱՄՆ-ում տեղի են ունենալու նախագահական ընտրություններ, նախագահ Բարաք Օբաման չի ցանկանա հակամարտության մեջ մտնել Հայկական լոբբիի հետ, և, ամենայն հավանականությամբ, Մեթյու Բրայզան վայր կդնի իր լիազորությունները»։
Ադրբեջանում ԱՄՆ դեսպանատան մամլո ծառայության ղեկավար Քիթ Բինը հաստատել է, որ տարեվերջին Բրայզան մեկնելու է Վաշինգտոն, ուր Սենատում քննարկելու են նրա թեկնածության հարցը.
«Պարոն Օբաման Մեթյու Բրայզային Ադրբեջանում ԱՄՆ դեսպանի պաշտոնին է նշանակել 2010 թվականի դեկտեմբերի 30-ին՝ օգտվելով իր սահմանադրական իրավունքից, որ Սենատը գտնվում է արձակուրդում։ Այդ նշանակումը շարունակվում է մինչև Սենատի հաջորդ նստաշրջան։ Օբաման նորից ներկայացրել է Բրայզայի թեկնածությունը՝ Բաքվում նրա լիազորությունների երկարաձգման համար։
Ներկայումս Սենատը դիտարկում է Բրայզայի թեկնածության հարցը և մինչև ներկայիս նստաշրջանի ավարտ պետք է որոշում ընդունի այդ կապակցությամբ։ Ակնկալվում է, որ Սենատի ներկայիս նստաշրջանն ավարտվելու է դեկտեմբերի վերջին։ Եթե Սենատը չհաստատի նրա թեկնածությունը, ապա դա կնշանակի դեսպանի պաշտոնում Բրայզայի լիազորությունների կասեցում»։
