Տարին հաջող էր այն առումով, որ ամբողջ տարին աշխատել եմ, ամիսը գոնե 3 ժամ տևողությամբ 8 մենահամերգ եմ ունեցել ջազային ակումբներում: Համերգներով եմ հանդես եկել ՌԴ-ում, Լոնդոնում, եվրոպական շատ քաղաքներում: Այդ առումով տարին բեղմնավոր էր:«Առաջին լրատվական»-ի հետ զրույցում ասաց երգչուհի Շուշան Պետրոսյանը՝ ընդգծելով, որ իր համար ամենակարևորը, թերևս, իր ընկերների հետ Հայաստանի ու Արցախի սահմանամերձ զորամասերի առաջին գծում ունեցած համերգներն են եղել:
«Երգն իր մեջ շատ մեծ ուժ ու խորհուրդ ունի ու շատ կարևոր է ոգեղեն այդ սնունդը տալ զինվորներին»,- նշեց երգչուհին:
Ինչ վերաբերում է տեսահոլովակներին, ապա երգչուհին հայտնեց, որ արդեն վաղուց չի նկարում տեսահոլովակ` ձգտելով ուշադրությունը հատկացնել կենդանի հնչողությամբ համերգներին: «Իմ արվեստը գնահատողները գիտեն, որ ինձ կարելի է լսել կենդանի` ամեն շաբաթ ակումբներում իմ անբաժանելի «ԱրթՎոյսիզ» սեքստետի հետ»,- ասաց Շ. Պետրոսյանը:
Նա ուրախությամբ տեղեկացրեց, որ արդեն ավարտին են մոտենում իր երկու ձայնասկավառակների աշխատանքները, և հանդիսատեսի դատին շուտով կհանձնվի դուետներով ձայնասկավառակը ու վաղուց ծրագրված հայրենասիրական երգերի «Իմ անուշ հայրենիքի» 2-րդ մասը` «Հայաստան ասելիս»:
Երգչուհին պատրաստվում է մեծ մենահամերգի` նվիրված իր ստեղծագործական կյանքի 20-ամյակին: «Այս տարի, ցավոք սրտի, Օպերայում դեկտեմբերին ազատ օր չկար այն գաղափարի համար, որ ուզում էինք իրագործել, այնպես որ համերգը տեղի կունենա հաջորդ տարի»,- նշեց երգչուհին:
Շ. Պետրոսյանը նաև ավելացրեց, որ արդեն 2 տարի է, ինչ նախագահում է Կրասնոդարի մարզի Տուափսե քաղաքում անցկացվող «Ոսկե ծիրան» հայ մշակույթի փառատոնը:
«Այնտեղ խստիվ հետևում եմ, որ ամեն ինչ հայեցի լինի, քանի որ, ցավոք, սփյուռքում ավելի գերիշխում է անճաշակ երաժշտությունը, որտեղ գերիշխող լադերն արևելյան, թուրքական լադերն են: Ես ուզեցի հայ մշակույթի նկատմամբ կարծիքը փոխել օտարազգիների մոտ, որովհետև դա համարում եմ անթույլատրելի ու անարժանապատիվ»,- ընդգծեց Շուշան Պետրոսյանը:
Երգչուհին նաև տեղեկացրեց, որ համագործակցում է հայաստանյան մի շարք ռոք խմբերի հետ ու շատ շուտով անակնկալ կմատուցի իր հանդիսատեսին: Մասնավորապես, «Ոստան հայոց» ռոք խմբի հետ Շ. Պետրոսյանը ձայնագրել է մի կոմպոզիցիա, որի հիման վրա վիդեոշարք է հավաքվում, երգչուհին համագործակցում է նաև «Օքսենհեմ» խմբի հետ:
