Բեյրութում լույս տեսնող «Արարատ» թերթի խմբագիր Ահարոն Շխրտմյանը, «Առաջին լրատվական»-ի հետ զրույցում, անդրադառնալով նոյեմբերի 18-ին լրագրողների հետ հանդիպմանը նախօրեին կատարված հայտարարությանը, ըստ որի` ստեղծվելու է սփյուռքահայ ներդրողների շահերի պաշտպանության հիմնադրամ, դրական համարեց սփյուռքահայերի վստահությունը Հայաստանի նկատմամբ վերականգնելու քայլը:
Նրա խոսքով, լավ կլիներ, որ հենց պետությունը հանդես գար նման նախաձեռնությամբ ու հովանավորեր այդ նախաձեռնությունը, որ սփյուռքահայերն ավելի քաջալերվեն:
Մեզ հետ զրույցում Ա. Շխրտմյանը տեղեկացրեց, որ ուշադիր հետևել է երեկ արված հայտարարությանը, ու ցանկություն հայտնեց, որ «սփյուռքահայերի հանդեպ հոգատարությունը ունենա նաև իր պետական հովանոցը, որ նախաձեռնությունն ավելի արդյունավետ լինի:
Նրա խոսքով, խնդիրը ոչ միայն սփյուռքահայ ներդրողին պաշտպանելը պետք է լինի, այլ ընդհանրապես օտար ներդրողին պաշտպանելը:
Ներդրողը, ըստ Ա. Շխրտմյանի, Հայաստանում ներդրում կատարելիս պետք է պետական երաշխիքներ ունենա:
«Իրավական առումով պետք է պաշտպանված լինեն երկու կողմի` և՛ սփյուռքահայի` ներդրում կատարողի, և՛ տեղացիի` գործարքի մեջ մտնողի իրավունքները»,- նշեց վերջինս` շեշտելով, որ «այդ հովանոցի տակ» պաշտպանված լինելով միայն կարող է ներդրողը ազատ գործունեություն ծավալել երկրում:
«Երկուստեք պաշտպանության կարիք կա, որ աշխատանքն ավելի հիմնավոր լինի»,- հավելեց «Արարատի» խմբագիրը:
