Ինչպես հաղորդում է Associated Press-ը, ավստրալիական The Age թերթի լրագրողը փողոցում գտել է ԱՄՆ նախագահ Բարաք Օբամայի Ավստրալիա կատարած այցի մասին գաղտնի տվյալներ պարունակող գրքույկ:
120 էջանոց գրքույկում եղել են այս շաբաթ կայացած այցի ընթացքում Օբամայի տեղաշարժերի, նրա անվտանգության ապահովման մասին տեղեկություններ, ինչպես նաև՝ ամերիկյան և ավստրալիական բարձրաստիճան պաշտոնյաների բջջային հեռախոսների համարներ:
Լրագրողը հայտնել է, որ գրքույկը գտել է Ավստրալիայի մայրաքաղաք Կանբերայում՝ խորհրդարանի շենքից հարյուր մետրի վրա գտնվող ջրափոսում:
Ավստրալիայի գլխավոր դատախազը հայտարարել է, որ այս միջադեպի կապակցությամբ հետաքննություն է սկսվել:
