Դեկտեմբերին պատրաստվում է ֆիլմերի ցուցադրության մի ամբողջական ծրագիր, որը The Club-ում դեկտեմբերի 1-ից կունենա երկու ցուցադրություն՝ երեքշաբթի ու հինգշաբթի օրերին:
Այս մասին «Առաջին լրատվական»-ի հետ զրույցում ասաց ֆիլմերի ցուցադրության կազմակերպիչ Մելիք Կարապետյանը, ով 2009-ից զբաղվում է The Club-ում ֆիլմերի ցուցադրություններով:
Հարցին` ի՞նչ նպատակ է հետապնդում երևանյան ակումբներից մեկում ֆիլմերի մշտական ցուցադրություններ կազմակերպելը, Մ. Կարապետյանն ասաց, որ ակումբը մարդկանց հնարավորություն է տալիս ֆիլմեր դիտել նաև երեկոյան ժամերին, բացի այդ՝ հենց այս ակումբի օրինակը վարակիչ եղավ, որ երևանյան որոշ ակումբներ ու սրճարաններ ցուցադրեն ֆիլմեր, ինչը, սակայն, չի կրում շարունակական բնույթ:
Մ. Կարապետյանի խոսքով, բացի The Club-ից, համակարգված կերպով ֆիլմեր են ցուցադրում «Նարեկացի» արվեստի միությունն ու ՆՓԱԿ-ը:
Նա տեղեկացրեց, որ դեկտեմբերյան ծրագիրը բաղկացած է 10 գեղարվեստական ֆիլմից: Ասաց նաև, որ ՆՓԱԿ-ում դեկտեմբերի 3-ին կբացվի «Արդյունաբերական սիմֆոնիա» լուսանկարչական ցուցադրություն-մրցույթը (համադրող` Վիգեն Գալստյան, Ավստրալիա), և հենց նա էլ կազմել է The Club-ում ցուցադրվելիք ֆիլմերի ցանկը` նվիրված արդյունաբերական ճարտարապետությանը:
Դեկտեմբերյան ցուցադրությունը կբացվի գերմանացի ռեժիսոր Ֆրիտց Լանգի «Մետրոպոլիս» ժապավենի ցուցադրությամբ: Կցուցադրվեն նաև Անտոնիոնիի, Ձիգա Վերտովի, Դուշան Մակաևի, Ալեքսանդր Զարխիի, Յասուզո Մասումուրայի, Դունկան Ջոնսի, Ջեյմս Բրիջի ֆիլմերից:
