Այսուհետ գործարար Սիլվա Համբարձումյանը քաղաքում կշրջի թիկնապահներով. ոստիկանապետ Վլադիմիր Գասպարյանը կատարել է գործարար կնոջ խնդրանքը իրեն թիկնապահ տրամադրելու վերաբերյալ: Այս մասին «Առաջին լրատվական»-ի հետ զրույցում տեղեկացրեց գործարար Սիլվա Համբարձումյանը:
«Ես առավոտյան փաստաթուղթ կստորագրեմ, և թիկնապահն այսուհետ կուղեկցի ինձ»,- նշեց Համբարձումյանը`հավելելով, որ իրեն մեկ թիկնապահը լրիվ բավարար կլինի:
Նշենք նաև, որ այսօր գործարարը օրեր առաջ Երևանի «Արմենիա-Մարիոթ» հյուրանոցում տեղի ունեցած միջադեպի առնչությամբ ցուցմունք է տվել Հատուկ քննչական ծառայությունում: Նա տեղեկացրեց, որ հանգամանորեն ներկայացրել է միջադեպը և դրա համար պատճառ հանդիսացած հանգամանքները:
Հիշեցնենք, որ օրեր առաջ Երևանի «Արմենիա-Մարիոթ» հյուրանոցում իր փաստաբանին սպասող գործարար Սիլվա Համբարձումյանին էր մոտեցել Սյունիքի մարզպետ Սուրեն Խաչատրյանը և հարվածել նրան:
Փաստի առթիվ հարուցվել է քրեական գործ, որի շրջանակում հարցաքննվել է նաև Սուրեն Խաչատրյանը: Միջադեպի հանգամանքները քննվում են: