Ադրբեջանական Trend լրատվական գործակալության փոխանցմամբ՝ Վրաստանի ներքին գործերի նախարար Վանո Մերաբիշվիլին ու ԱՄՆ ռազմածովային ուժերի քարտուղար Ռեյ Մաբուսն այսօր դռնփակ հանդիպում են ունեցել։
Հանդիպման ժամանակ կողմերը քննարկել են առափնյա պաշտպանության ոլորտում համագործակցության հարցը։ Հանդիպումից հետո Մերաբիշվիլին լրագրողներին հայտնել է, որ հանդիպման ժամանակ քննարկվել են երկկողմանի համագործակցության զարգացման ու անվտանգության հարցեր.
«Եթե Վրաստանի ՆԳՆ-ի տարբեր ստորաբաժանումների ֆինանսավորումը կատարվում է պետբյուջեից, ապա Վրաստանի առափնյա պաշտպանությանը մեծապես օգնում է ԱՄՆ-ը։ Մենք քննարկել ենք նաև ծովային մաքսանենգ ճանապարհով զենքի, թմրանյութերի, զանգվածային ոչնչացման զենքի (ԶՈԶ) փոխադրման կանխման հարցում առավել սերտ համագործակցելու հարցը։
ԱՄՆ աջակցությամբ Վրաստանը կտեղակայի ռադարային համակարգեր, որոնք նրան հնարավորություն կընձեռեն ամբողջովին վերահսկելու սեփական տիրույթը»:
Մայբուսն իր հերթին նկատել է. «Վրաստանն ԱՄՆ-ի լավ գործընկերն է, երկու երկրների միջև համագործակցությունը պետք է ամրագրվի նաև ռազմական ոլորտում։ Ամերիկյան ռազմանավերը կշարունակեն Սև ծովում համատեղ զորավարժություններ անցկացնել Վրաստանի առափնյա պաշտպանության նավերի հետ»։
Հիշեցնենք, որ Մաբուսը Վրաստանից մեկնելու է Ադրբեջան։