Իտալիայի նոր վարչապետ Մարիո Մոնտին, նոյեմբերի 18-ին ելույթ ունենալով Ազգային խորհրդարանի պատգամավորների առաջ, պատգամավորներին խնդրել է իրեն անվանել պրոֆեսոր, այլ ոչ թե վարչապետ:
Ինչպես հայտնում է РИА Новости-ն, Իտալիայի ստորին պալատը ուրբաթ օրը քվեարկելու է Մոնտիի կառավարությանը վստահություն հայտնելու հարցը:
Մարիո Մոնտին, բացի ԵՄ հակամենաշնորհային հանձնաժողովի նախկին տնօրեն լինելուց, վերջին տարիներին գլխավորել է Միլանի Բոքքոնի տնտեսագիտական համալսարանը:
«Ես ձեզ կխնդրեի ինձ անվանել «պրոֆեսոր» այն բանի համար, որ կառավարության ղեկավարի տիտղոսը երկար չեմ կրելու»,- ասել է Մոնտին:
Ընդ որում, նա ավելացրել է, որ իր կառավարությունը իշխանությունում երկար ժամանակ չի մնալու (հերթական խորհրդարանական ընտրությունները տեղի են ունենանլու 2013 թվականին):
«Նախագահները գնում են, իսկ պրոֆեսորները՝ մնում»,-նշել է նոր վարչապետը:
Խոսելով իր պլանների մասին՝ Մոնտին հայտնել է, որ հաջորդ շաբաթ գնալու է Բրյուսել, որտեղ Եվրախորհրդի նախագահ Հերման վան Ռոմպեյին ներկայացնելու է բարեփոխումների նոր ծրագիրը: Բացի այդ, նա հաջոդ շաբաթ հանդիպումներ է ունենալու Ֆրանսիայի նախագահ Նիկոլա Սարկոզիի և Գերմանիայի կանցլեր Անգելա Մերկելի հետ: