Այսօր, ժամը 16:00-ին, Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում պետք է տեղի կայանար ՀՀ ԶՈՒ զինծառայող Վալերի Մուրադյանի սպանության գործով քննիչի անօրինական գործողությունների դեմ բերված բողոքի վերաբերյալ դատական նիստը, դատավոր` Խաչատրյան, փաստաբան` Ս. Սաֆարյան, սակայն ինչ-ինչ պատճառներով նիստը հետաձգվել է: Այս մասին «Առաջին լրատվական»-ին տեղեկացրեց «Բանակն իրականում» քաղաքացիական նախաձեռնությունը:
Հիշեցնենք, որ ըստ պաշտոնական վարկածի` Վալերի Մուրադյանը 2010թ. մարտի 15-ին ինքնասպան է եղել` պարանի միջոցով երկաթե ձողից կախվելով: Գործը կասեցվել է, իսկ 2011թ. հունվարին տղայի մոր` Նանա Մուրադյանի բազմաթիվ բողոքներից հետո հանձնարարվել է ՊՆ քննչական ծառայությանը լրացուցիչ նախաքննություն իրականացնել:
Նախաքննության վերսկսումից հետո կալանավորվել է զինծառայող, որը մեղադրվել է դեպքից մեկ ամիս առաջ Վ. Մուրադյանին ապտակելու և նվաստացնելու համար: Զինծառայողի նկատմամբ քրեական հետապնդումը դադարեցվել է ԱԺ համաներման մասին որոշման հիման վրա:
Ըստ դիմումատուի` նախկին քննիչ Արման Ապրեսյանը պատշաճ կարգով չի կատարել իր պարտականությունները, ինչպես նաև թույլ է տվել բազմաթիվ ապօրինի գործողություններ:
Դեկտեմբերի 1-ին, ժամը 12:00-ին, Շիրակի մարզի ընդհանուր իրավասության դատարանում կկայանա «Մատաղիսի գործով» հերթական դատական նիստը, նախագահող դատավոր` Մովսիսյան, փաստաբան` Ս. Ոսկանյան: