Այսօր լրագրողների հետ հանդիպմանը «Ժամանակ» օրաթերթի գլխավոր խմբագիր Արման Բաբաջանյանը ազդարարեց սփյուռքահայ ներդրողների շահերի պաշտպանության հիմնադրամի ստեղծման մասին:
Նրա խոսքով`այս նախաձեռնության գաղափարն իր մոտ առաջացավ այն ժամանակ, երբ այս ամռանն ԱՄՆ-ում հանդիպեց ու զրուցեց մի գործարարի հետ, որին Հայաստանի իշխանությունները մի քանի միլիոն դոլար «քցել» էին, և մարդն ի վերջո սնանկացել էր:
«Նպատակն այն է, որ Հայաստանում ստեղծենք այնպիսի միջավայր, որ սփյուռքահայն իրեն պաշտպանված զգա: Մենք պետք է հասցնենք մեր ուղերձը նրանց` տեղեկացնելով, որ Հայաստանում կա հասարակական նախաձեռնության մի ֆորմա, կան մարդիկ, ովքեր պատրաստ են կռվել նրանց իրավունքների համար»,- նշեց Ա. Բաբաջանյանը` շեշտելով, որ ստեղծվելիք կառույցը պետք է առավելագույնս լինի ապաքաղաքական և շեշտը դնի այդ մարդկանց իրավունքների վերականգնման վրա:
Նրա խոսքով` ներդրողները պետք է հասկանան, որ հայաստանցին իսկապես մտահոգ է իր ազգակցի իրավունքների պաշտպանությամբ:
Ա. Բաբաջանյանն ասաց` բազմաթիվ իրավապաշտպաններ ու փաստաբաններ արդեն իսկ պատրաստ են միանալ սփյուռքահայ ներդրողների պաշտպանության հիմնադրամին:
Ըստ նրա` սփյուռքահայերի շահերի պաշտպանությունը համակարգային խնդիր է, ու նա հրավիրեց բոլոր շահագրգիռ կառույցներին` միանալու այս նախաձեռնությանը:
«Միայն այս կերպ կկարողանանք կոտրել այս սառույցը: Հատու, նպատակային կերպով քրեական մտածողությամբ պաշտոնյաները «քցում» են ներդրողներին»,- հայտարարեց նա:
Նախաձեռնող խմբի անդամների թվում են Հայաստանի փաստաբանների պալատի մի շարք հայտնի փաստաբաններ, նրանց թվում` Նիկոլայ Բաղդասարյանը, Սամվել Ջաղինյանը, Լեռնիկ Հովհաննիսյանը և այլք:
Այսօր բոլոր ԶԼՄ-ներին կտարածվի նախաձեռնող խմբի հայտարարությունը, համաձայն որի` հետայսու նախաձեռնող խումբը հետամուտ կլինի Հայաստանում բոլոր սփյուռքահայ ներդրողների իրավունքների կանխարգելման ու խախտված իրավունքների վերականգնման գործընթացին: